Ekonomîya cinîyan rixmê şer û ambargoyî zî morê xo da binê zaf projeyan. Nînan ra yew zî Kargehê Tekstîlî yê Lavîn o.

Kargehê Tekstîlî yê Lavîn 2015 de ronîya. Berhemê kargehî Hesekê, Dirbêsiyê, Qamişlo û Girkê Legê de dikananê Lavîne de roşîyenê.

Nesrîne Hecî Mihemeda ke ronayoxanê kargehî ra yew a îfade kerd ke înan bi zehmetîyan Lavîne akerda û vat: ''2015 ra nata ma bêmabên tîya de kar kenê. Lavîne her roje hîna aver şîye. Cinîyê kedkarî hîna zaf serê karî de serwer bîyî û înan tira hes kerd.Ma kenê ke cinîyan rê yew warê xebitîyayîşî pêşkêş bikerê. Çi ereb ba çi kurd ba. Kame karî biwaza ma tede xebitîyenê.

Ma tîya de kincanê herêmîyan ra heta kincanê modernan çeşid-çeşid kincan derzenê. Ma bi pereyêkê mehqûlî berhemanê xo roşenê. Ma bi nê hawayî hewcedarîyêka şarî zî peyda kenê. Seba ke Lavîne cinîyan rê warêko winasên pêşkêş kerdo, bawerîye dana cinîyan.''

Cîhane Sag di serrî yo Lavîne de xebitîyena. Cîhane vat: ''Mi verî karê pakîye kerdêne. Dima ez nê karî musaya. Ez hem debara keyeyê xo kena hem zî bena wayîra karêkî.''

Sîdra Mamî vat: ''Ma tîya de pîya xebitîyenê. Tîya de xebitîyayîş kêf dano mi.''

Zahîde Bedran vat: ''Ez tîya de ûtî kena. Ez bi xo debara keyeyê xo kena. Weş o ke cinîyî bieşkê payanê xo ser de vinderê.''

Maha Elî vat: ''Ma bi keda xo hem wayîrê keyeyê xo vejîyenê hem zî vînenê ke keda ma bîlasebeb nîya. Kar û kede çîyêko weş o.''