Hemserekê DEM Partî, wekîlî û keyeyê Sirri Sureyya Onderî vizêrî ra nata Îstanbul de, Merkezê Kongre yê Cemal Reşît Beyî de serweşîye qebul kenê. Embaz û hemrayanê Onderî ajansê ma rê qisey kerd.

Hemvervatoxa HDKyî Merale Daniş Beştaş vat: ‘’Onder wexto ke şîyêne zî karêko pîl kerd. Her kes kewt verê mergê ey. Ey xo resnabi xeylê merdiman. Bi taybetî menganê peyênan de ey babeta haştîye de zaf xîret kerd. Kombîyayîşê dormeyê ey mojneno ke Tirkîya haştîye rê amade ya. No çîyêko ercîyaye û girîng o. Ganî ma haştîye bîyarê ca. Seba ma pêroyînan no mesuldarîyêka pîl a.’’

Wekîlê DEM Partî yê Mûşî û Serekwekîlê Koma DEM Partî Sezaî Temellî: ‘’Wextê cenaza de fekê her kesî de haştîye estibî.Şar wayîrê vîrameyîş û têkoşînê Sirri Sureyya Onderî vejîya. Mîraso ke şaranê Tirkîya rê mendo têkoşînê haştîye yo. Onderî hertim qalê vengdayîşê Ocalanî kerdêne. Nika erkê ma yo ke ma nê vengdayîşî bîyarê ca. Ganî ma seba awankerdişê haştîye, seba rêxistinkerdişê komelê demokratîkî û vurnayîşê pîlî xîret bikerê.’’

Wekîlê CHPyî yê Amedî Sezgîn Tanrikulu: ‘’Sirri aktorêko sîyasî yo girîng bi. Kesanê ke o sey dişmenî dîyêne zî bi qiseyanê Sirriyî bawer kerdêne. Dostê ma wefat kerd. Erkê ma yo ke ma mîsyonê ey rê dewam bikerê û haştîye bîyarê ca.’’

Wekîlê DEM Partî yê Îstanbulî Cengîz Çîçekî vat: ‘’Cewabo tewr manadaro ke ma bidê Onderî komelkîkerdişê haştîye yo. Pîlkerdişê fikrê haştîye û caardişê atmosferê haştîye yo.’’

Wekîla DEM Partî ya Mersînî Perîhane Koca vat: ‘’Ma sutunêkê haştîye vinî kerd. Ma komelêko winayên ê ke bedelê giranî dayê. Sirriyî barêka girane ma milî de verdaye.’’

Wekîlê DEM Partî yê Mersînî Alî Bozanî vat: ‘’Bi hezaran, bi des hezaran kesan pîya yew slogan vat; ‘Ma sozê haştîye danê Sirri.’ Uca de tena kurdî ney her ca ra merdimî est bîyî. Embaz Sirriyî xeylê tabuyî rijnayî.’’

Wekîla DEM Partî ya Riha Dîlane Kunt Ayhan vat: ‘’Sirriyî peyê xo de mîrasêko pîl verda. Ganî no bêro pawitene. Na yewîye, na embazîye mîrasêk o. Ganî ma nê mîrasî pîlêr bikerê û ser bivisnê. Yanî hêvîya haştîye. Ganî ma mîrasê Sirriyî bîyarê ca.’’