Hêrişê vera Rojawanî her rojê zafêr benê.  Hêzanê Pawitişê Komelî (HPC) hem hetê leşkerî hem zî hetê komelkî ra roje û şewe semedê pawitişê herra xo guruyene. Badê Şorişê Rojawanî çarçeweya projeyê Neteweya Demokratîke de HPC ame ronayene ke waranê cuya komelkî paweno. HPCyo ke şar û bajarî paweno her roje wezîfeyê ci giranêr beno.

Endama HPCyî Semîra Şûkrîya ke ANFyî rê qisey kerd bale ante rolê dayîkan ser û vat: ''Çew nêşkeno dayîkan birersno û îradeyê ma bişikno.  Ma sey dayîkan amadeyê ke cephe de bixebitê.Ganî heqê cinîyan bêrê pawitene û cinîyî zî şar, kultur, doman û taxanê xo bipawê. Eke cinîyî heq û komelê xo bipawê ma eşkenê herra xo zî bipawê. 

Ma soz dayo qehremananê ke gonîya xo semedê na herre rişnaya, ma do têkoşînê înan biresnê serkewtişî. Cinîyê ke paştîya înan xo ra pêt a tewrê HPCyî bîyî ke înan ra yew zî ez a. Ma şewe nobede tepişenê. Taxe, kuçe û bajaranê xo pawenê. Ma wazenê barê YPJ û YPGyî şenik bikerê. Her kes taxa xo paweno. Paştê YPJ û YPGyî do nêro war, cunkê dayîkî peyê înan de yê.

Ganî şarê ma hinî xo goreyê Şerê Şarî yê Şorişgêrî rêxistin bikero. Ez pê sareberz a ke  herra xo pawena. Sey mi heme dayîkî eşkenê HPCyî de cayê xo bigêrê. Hewce nêkeno dayîkî tewrê şerî bibê la eşkenê taxanê xo bipawê. Eke ma ewro keye û taxanê xo bipawê ma eşkenê herra xo zî bipawê. Gama ke çeteyanê DAÎŞî hêrişê taxa Xiwêranî yê Hesekê kerd muhîmîya rolê HPCyî reyna vejîyayî werte.''