Endama Komîteya Rayberdişî ya PKKyî Xalîde Engîzeke çalakîya fedayîye ya Zîlane (Zeynepe Kinaci) ser o qisey kerd.

Xalîde Engîzek vist vîrî ke Zîlane 30ê hezîrana 1996î de Dêrsim de çalakîya fedayîye kerde û şexsê Zîlane de aye pêro şehîdê têkoşînî yad kerdî. Xalîde Engîzek wina qisey kerd:

''Embaze Zîlane amadekarîya çalakîye ra dima Dêrsim de merasîmê leşkerî de sey volkanêk teqaye. Gonîya embaze Zîlane herikîyaye Çemê Munzurî. Ruhê Zîlane peykerê Seyîd Rizayî rê vat 'Mi qesasê ê cinî û veyveyanê ke xo kendalî ra eştî war, qesasê ê dêrsimijanê ke ameyî qirkerdene, qesasê ê domananê ke ameyî asîmîlkerdene, qesasê kênayan ê vînîbîyayeyan ê Dêrsimî girewt.

O çax Dêrsim merkezê asîmîlasyonê domanan bi. Embaze Zîlane pê çalakîya xo zerrîya şarî ra ters wedarna û bîye sembol. Na çalakîye zerrîya pêro partîzanan kerde germ. Dişmen vera na çalakîye recifîya. O çax vera partîya ma û Rayberîya planê komployî estbî. Embaze Zîlane pê hîşmendîya ke hêrişê vera Rayberîye hêrişê pêro kurdan o, têgêraye. 6ê gulane de raşta zî vera Rayberîye pê wesayîtê bombabarkerdeyî suîkast ame kerdene. Sîkast ser nêkewt. Rayberîye çapemenîye rê qisey kerd û bale ante ser ke komployî şexsê ey de vera Kurdîstanî yenê kerdene. Embaze Zîlane waşt biba cewabê nê hêrişan.

Rayberîye seba tewirê embaze Zîlane vatbi 'Raştîya Zîlane verê ma akerd. Beno ke şima xo vîrî ra bikerê la wasîyetê ey esto. Wesîyetê ci seba ma ferman o. Nê esasî ser o ma do perwerîya wesîyetanê şehîdan bibê û qetî ci ra fek vera nêdê. Seke Rayber Apoyî vat çalakîya Zîlane seke manfîsto bîye. A vera teslîmbîyayîşî û tasfîye bîye cewab. Embaze Zîlane bi sereyê xo sey artêşêke têgêraye.

Ruhê Zîlane nika Kurdîstan de gerîlayan de ciwîyeno. Alaya ke embaze Zîlane berz kerde pê têkoşînê cinîyan bena pîle, partîbîyayîşê cinîyan de bena xorine.  Çalakîya Zîlane ra dima bi hezaran cinî û camêrdî tewrê gerîlayan bîyî. Têgêrayîşê Cinîyan rayberîya mobernîteya demokratîke kenê.Bi taybetî Şorişê Rojawanî de têkoşînê cinîyan ê kurdan pêro dinya rê bi hawayêkê xurtî tesîr kerd. Têgêrayîşê cinîyan ê dinya warêkê qijî de teng mendîbî. La serranê peyênan de cinîyê dinya hînî têkoşînê xo derbazê waran kenê û vera sîstemî tewirêkê xurtî mojnenê.''