Halê weşîye yê tepişteyanê sîyasîyan Maşallah, Mehmet û Denîz Erbeyî ê ke tewrê xoverdayîşê grevê vêşanîye bîyî ver bi başîye şino. 

Meryem Erbeye ya 65 serrî ke hîrê domanê aye zîndananê cîyayan de kewtî grevê vêşanîye, vat ke Mehmet Erbey 26’ê Kanûne de Zîndanê Duzce yê Tîpê T’yî de, keynaya aye Maşallah Erbeye 5’ê çele de Zîndanê Bunyanî yê Kayserîyî yê Cinîyan ê Girewteyî de û lajê aye Denîz Erbeyî yê 22 serrî zî Zîndanê Denîzlî de kewtê xoverdayîşê grevê vêşanîye.

Keynaya aye Maşallahe ke des serrî cezaya zîndanî aye rê ameya dayene, pîya bi grûbanê ewilênan dest bi çalakîya grevî kerde, gama ke Zîndanê Kayserî de xoverdayîşî mîyan de bîye problemê çiman virazîyayî û gonî virite.

Lajê aye Mehmeto ke 23 serrî cezaya zîndanî ê rê amî dayene 26’ê Kanûne de tewrê xoverdayîşê grevê vêşanîye bi.

Maya înan Erbeye ard ziwan ke halê weşîye yê domananê aye wextê xoverdayîşî de xirab bi û dimayê qedîyayîşê çalakîye dest bi şimitişê şorba kerdê, la hewna nêeşkenê were normalî biwerê. Erbeye vat, “Nêweşîyêka mendeye înan de nêvejîyaye. Qe nêbo ma ra wina vanê. Labelê serranê ameyoxan de do xo ramojno.”

 Erbeye vat, “Ê her tim amade yê ke bedenê xo bidê vêşanîye ser” û vat, “Labelê na yewe çareserî nêya. Seba îhtîyacî bi çalakîyanê bi nê hawayî nêmano xusûsen ma yê ke teber de yê, Kurdî ganî nê prosesî rê wayîr vejîyê, yanî tecrîdêkê neweyî rê destûr nêdê. Ma, mayê înan ma do bibê vengê înan.”