Fermandaranê YJA Starî ra Emîne Ercîyese Radyoyê Dengê Welatî de rojdem ercna.

Ercîyese grevê vêşanîye yê ke bi serkewtiş qedîyayî sey xoverdayîşêko tarîxî name kerd û vat: ‘’Leyla Guvene, Nasir Yagiz û embazê ke zîndanan de yê û heme xoverdayoxê grevê vêşanîye bibî leteyêkê cuya ma. Bi na çalakîye ruhê xoverdayîşî reyna vejîya werte. Bi ameyîşê wisarî embazê ma gerîlayî zî bi çalakîyanê xo tewrê prosesî bîyî. Bi taktîkanê zengînan şîyî dişmenî ser û netîceyê serkewteyî girewtî.’’

Ruhê 14 Temmuze û Leylayan do Çirey Vînî Nêbo

Ercîyese vist vîrî ke menga Temmuze semedê tarîxê mucadeleyê înan mengêka muhîme ya û va: ‘’Serrgêra 20’ine ya komplo de Reyberîye ser o tecrîdêko giran ameyêne bicaardene. Înan waştêne ke komploya mîyanteweyîye newe bikerê. La embaze Leyla, xoverdayoxanê zîndanî, girevê ke heme cayanê dinya de ameyî viraştene, çalakîyanê fedaîyan û îradeyê şarî destûrê naye nêda. Ruhê xoverdayîşî yê Kemal, Hayrî, Alî û Akîfan heme cayê Kurdistanî ra vila bi. Ruhê 14’ê Temmuze û Leylayan do çirey vînî nêbo.’’

PKK Tim Qesasî Esas Geno

Erciyese bale ante serê weçînitişê Stenbolî û wina dewam kerd: ‘’Weçînitiş bêşik o ke semedê hîleyanê neweyan ame newekerdene. Seba ke peynîya AKP’yî ameya hîleyan fînenî dewre. Stenbol xeylî wext o destê înan de yo.  Heme planê xo yê leyminî ûca kerdêne. Coka nêwaştêne vînî bikerê. Nêzdîbîyayîşê şarê Kurdî yê nê weçînitişî zaf bimana bi. Tewirêko raşt bi. Her kesî dîye ke nêzdîbîyayîşê Kurdan senî dano qezenckerdene û vînîkerdene. Reyna hemîyan dîye ke Kurdî bi di qalan nênê xapînayene. Netîceyê weçînitişê Stenbolî vindertişê Kurdan ê vera AKP’yî ramojna. Mucadele nêqedîya dewam keno. Wextê grevê vêşanîye de dayîkan zî xoverdayîşêko xurt ramot. Nêzdîbîyayîşê vera dayîkan zî do çirey nêro vîrakerdene. Kurdê bianorî çirey nê faşîzmî xo vîra nêkenê û bêcewab nêverdenê.  Xora raştîya PKK’yî de no wina yo, her wext qesas esas yeno girewtene.’’

PDK Teslîmê Dewleta Tirkî Bi

Fermandaranê Merkezê Qerargahî yê YJA Starî ra Emîne Ercîyese derheqê îşxalê dewleta Tirkî yê vera Başûrê Kurdistanî de zî nê vatî: ’’PDK’yo ke teslîmê Tirkîya bîyo bi hemkarîya AKP’yî wazeno ke têgêrayîşê ma çîn bikero. Her roje sivîlî yenê qetilkerdene la PDK vera naye tewir ra nêmojneno. Şarê Başûrî vera îşxalê dewleta Tirkî reaksîyon ramojneno û PKK’yî sey umîdê azadîye vîneno. PDK wazeno ke vernîya naye bigêro. PDK goreyê waştişê şarî nê, semedê domnayîşê sîstemê xo yê îqtîdarî têgêreno. Ewro dewleta Tirkî çar perçeyanê Kurdistanî rê hêriş kena. Ganî vera naye heme Kurdî hurzê lingan ser, wayîrê yewbînan bivejîyê û hêrişê îşxalkaran veng vejê. Ma wextêkê tarîxîyî ra ravêrenê. Ma sey gerîlayî do bi moralêkê xurtî heta azadîya Rayberîya ma rol û mîsyonê xo bica bîyarê. Ma do serkwtişêko mende dest bifînê.  Heta serkewtişî do mucadeleyê ma çirey zêîf nêbo. Çalakî û xoverdayîşê ma do her roje bibê xurt.’’