Endama Heyetê Rayberdişî ya Kongreya Starî Hîva Erebo serra 2019î û 2020î ANF reyde ercnaye.

Erebo vat: "Serra 2019î serra îşxalî bîye. Karê Kongreya Starî zî hîra bîyî. Ma armanc kerdbi ke serra 2019î de hetê dîplomasî ra xo biresnê girseyêkê hîrayî. Ma warê sîyasî û komelkîyî de ma goreyê nê armancê xo xebitîyayî. Warê rêxistine de zî wina yew armancê ma esto; ma wazenê xo biresnê her cinîye. Bi taybetî babeta heqanê cinîyan de asta tewr berze de armancê ma estê."

Armancê ma yo tewr grîng zî açarnayîşê şarê Efrînî warê xo bi. Na babete ser o ma çalakîyî û karî kerdî. 

Şerê Serêkanîyê û Girê Sipî de cinîyî ameyî hedefkerdene. Sey Hevrîne Xelef, Dayîka Eqîde û embaze Amara zaf embazê ma şehîd bîyî. Nê hêrişî vera sîstemê Rojawanî yê. Metodê ma yê rêxistine û asta ma ya hîşmendîya cinîyan sîstemê pederşahîye visneno rewşêka bitehlûke. Coka hêrişê vera rêxistinbîyayîşê cinîyan yenê kerdene.

Seba yewîya neteweyîye ma wazenê rol û mîsyonê xo bîyarê ca. Na babete de karê ma estê. Zaf girîng o ke cinîyî karêkê hemparî bikerê. Ma waşt ke tay partîyê bînî zî tewrê ma bibê la înan nêwaşt. 

Serra 2020î de têkoşîn do dewam bikero. Ma do rêxistinbîyayîşê xo xurtêr bikerê. Waranê perwerdeyî, xopawitişî, xoresnayîşî û dîyalogî de armancê ma estê. Ma do bi şîara 'Ganî cinîyêke zî bêrêxistin nêba têbigêrê. YPJ hêzê pawitişî yo û wayîrê tesîrêkê girîngî yo. YPJyî bi serran rûmetê cinîyan û komelî pawit. Ma rê armanc o ke ma paştî bidê YPJ û her hetî ra ey xurt bikerê. 

Seba holkerdişê rewşa ekonomîke û komelî karê ma yê ekonomîkî zî do bibê. 

Serra 2020î seba ma do biba serra berzkerdişê têkoşînî û vindertişê îşxalî biba. Seba ke şarê Efrînî, Serêkanîyê û Girê Sipî abigêrê erdê xo ma do bixebitê, têkoşîn bikê û xo ver bidê.

Ma venga cinîyanê kurdan û dinya danê ke ma serra 2020î bikerê serra xoverdayîşî û têkoşînî; seba cinîyanê Rojawanî zî ma serra 2020î bikerê serra destkewteyan û pawitişî. Rojawan de mîrasê têkoşînî yê cinîyan yeno pawitene. Cinîyê dinya zî ganî wayîrê nê xoverdayîşî û têkoşînî bivejîyê. 

Ma hêvîdar ê ke ma do pîya têkoşînê azadîye yê cinîyan pîl bikerê.  Nê esasî ser o ma hêvîdar ê ke serra newîye seba cinîyanê kurdan û dinya biba serra xoverdayîşî û serkewtişî. Ma hêvî kenê ke serra 2020î seba pêro şaran biba serra haştîye û yewîye. 2019 bi zorî û zehmetîyan derbaz bîye. Serra 2020î seba pêro cinîyan û dinya do biba serra serkewtişî."