Endama Koordînasyonê KJKyî Besê Erzîncan Bernameyê 'Xwebûn'î yê Jin TVyî de sîstemê Komalanê Cinîyan ê Kurdîstanî (KJK) ser o qisey kerd.

Qiseykerdişê Besê Erzîncan ra tay noqtayê girîngî wina yê:

''Ronîyayîşê PKKyî ra nata mîyanê têgêrayîşê ma de tim cinîyî est bîyî. Rayberîye zî tim girîngîye daye beşdarîya cinîyan. Yanî verî ke KJK ronîyayo cara 40 serran embaze Sakîne Cansiz ra naya têkoşînê cinîyan mîyanê têgêrayîşî de est bi.

Rayberîye 1986 de keyeyî ercnayî û dîyar kerd ke ganî rêxistina cinîyan a xosere bêra awankerdene. YJWK bi nê hawayî ronîya. 1993 de artêşa cinîyan awan bîye û 1995 de Yewîya Azadîye ya Cinîyanê Kurdîstanî awan bîye. 2005 de dima ke konfederalîzmo demokratîk ame îlankerdene zî Koma Cinîyan ê Berzzan (KJB) ronîyaye. Tewr peyên 2014 de Komalê Cinîyanê Kurdîstanî (KJK) ronîyayî.

Na her safha seba cinîyan gamêka pîle bîye. KJK mîrasê nînan ser o ronîya. Mîyanê nê sîstemî de paradîgma û felsefeyêka pîle est a. Goreyê nê sîstemî ganî cinîyî vera hêrişan xo rêxistin bikerê û bipawê. Ma armanc kenê ke bi rêxistinîya cinîyan û bi serkêşîya cinîyan cuyêke awan bikerê.

Rayberîye tim waşt ke cinîyî bibê wayîrê îradeyê xoserî, fikr û hişmendîya xosere û bieşkê xo rêxistin bikerê. Mîyanê sîstemê netewe-dewlete de cinîyî nêeşkenê potansîyel, fikr û enerjîya xo eşkera bikerê. Seba ke cinîyî xo bişinasnê û rêxistin bikere kolektîfebîyayîş girîng o. Cinîyî ganî binê otorîteya dewlete û camêrdan de nêbê. 

Ma xo sîstemê modernîteya kapîtalîste ra abirnaye. Teyna seba azadîya cinîyan ney ma seba azadîya camêrdan û komelî zî xebitîyenê. KJK sîwana PAJK, YJA-Starî ya. Sîstemê KJKyî hîra û komelkî yo. Kadroyê ma yê serkêşî est ê la mîyanê ma de hîyerarşî çin a. Her cinîye eşkena tewra xebetanê ma biba. Paradîgmaya KJKyî paradîgmaya demokratîke, ekolojîke û azadîperestîya cinîyan a. Ma wazenê komelî serê bingeyê komun, meclîs, akademî û kooperatîfan de bi rêxistin bikerê. Bi nê hawayî zî cuya newîye awan bikerê. Ma ferzkerdişê koletîye red kenê.

Sîstemê KJKyî beno ke Kurdîstan de ronîya la seba pêro dinya û Rojhelatê Mîyanênî yo. Ma armanc kenê ke sîstemê konfederalîzmî serkêşîya cinîyanê dinya de awan bikerê.''