Erzîncane: Ma do bi xoverdayîşê xopawitişî hêrişan pûç bikerê

Endama Koordînasyonê KJKyî Besê Erzîncane vat: ''Hêrişê xayîn û gemarinî yê dewleta tirke do pê xoverdayîşê xopawitişî, xebatanê înşa û rêxistinîya cinîyan bêrê pûçkerdene. Xoverdayîşê cinîyan garantîya azadîya mendî ya.''

Endama Koordînasyonê KJKyî Besê Erzîncane derheqê hêrişanê dewleta tirke yê vera cinîyan de ANFyî rê qisey kerd.

Qiseykerdişê Besê Erzîncane ra beşêk wina yo:

''Dewleta tirke dişmena kahane ya kurdan û cinîyan a. Cinîyê kurdî çarçewa paradîgmaya Rayber Apoyî de tewr vernîya şerî de têkoşîn kenê û rolê serkêşîye anê ca. Nê hetî ra zî Şorişê Rojawanî şorişê cinîyan o û ewro zî Rojawan de vurnayîşê komelî serkêşîya cinîyan de yeno kerdene. Cinîyê kurdî her parçeyê Kurdîstanî de benê hedef la cinîyî pêro cayê dinya de xo rêxistin kenê û xoverdayîşî anê ca.

Dewleta tirke bi hîsê qesas, hêrs û nefretî 23ê temmuze de hêrişê embazanê ma Jîyane Tolhildan, Roje Xabûr û Barîne Botan kerd. Şexsê nê embazan de Şorişê Rojawanî, yewîya cinîyanê Rojhelatê Mîyanênî, şerwanê cinîyî ameyî hedefkerdene. Forumê Cinîyan ê Şorişê Rojawanî yê Qamişloyî ra dima no hêriş ame kerdene. Hêzanê Koalîsyonî no hêriş peygoş kerd. La nê 3 embazanê ma vera DAÎŞî şer kerdbi. No hêriş heman wextî de hemkarîya DAÎŞ û dewleta tirke zî eşkera keno.

Zap û Avaşîn de gerîlayê cinîyî serkêşîya YJA-Starî de mîyanê xoverdayîşêkê pîlî de yê. Cinîyê kurdî seba ke cuya azade armanc kenê yenê hedefkerdene. Ewro Rojhelatê Mîyanênî serkêşîya cinîyan ê kurdan de azadîye yena averberdene. Paradîgmaya azadîya cinîyan a Rayber Apoyî ewro tesîrê pêro dinya kena û YPJ zî na paradîgma temsîl kena. Coka embazê ma Jîyane Tolhildan, Roje Xabûr û Barîne Botan ameyî hedefkerdene.

Dewleta tirke herêmanê îşxalkerdeyan ê Rojawanî de û Vakurê Kurdîstanî de hêrişê cinîyan kena, dişmenîya cinîyan kena, vera cinîyan metodanê bêexlaqan ana ca. Jîyane Tolhildan, Roje Xabûr û Barîne Botan ruho fedayî yê cinîyan temsîl kerdêne. Hêrişê xayîn û gemarinî yê dewleta tirke do pê xoverdayîşê xopawitişî, xebatanê înşa û rêxistinîya cinîyan bêrê pûçkerdene. Xoverdayîşê cinîyan garantîya azadîya mende ya. Ma do vera dewleta tirke sere wedarnê, sîstemê konfederalîzmê demokratîkî aver berê û hem dewleta tirke hem zî serdestîya camêrdan birijnê.

Ma bingeyê felsefeya Rayber Apoyî de bi qerardarî û înarî Kurdîstan û Rojhelatê Mîyanênî de şorişê cinîyan bikerê. ''