Mehmet Keser serra 1986î de cinî û 6 domanê xo peyê xo verdayî û tewrê PKKyî bi. Mehmet Keser 1992 de şer de şehîd bi û qezaya Erdîşî ya Wanî de ame definkerdene.

Maya Haştîye Sabîha Keser (75) pare kerd ke a 30 serran ra nata pabeya haştîye ya. 

Dayîke Sabîha îfade kerd ke lajê ey Mehmet 30 serrî verî tewrê PKKyî bi û sayê ey aye zî têkoşînê azadîye şinasna. Dayîke Sabîha vat: ''Lajê mi hekîmtîye wendîye la dewlete hekîmtîye seba ke tewrê rayraşîyayîşê karkeran bi destê ey ra girewte. Ey tim persayêne vatêne 'Çira heqê kurdan binpay benê, heta key do wina dewam bikero?' Rojêke mi dî ke lajê mi bermeno. Mi va ti çira bermenî vat 'Mazlum Dogan merdo.' Dima lajê mi zewija, domanê ci bîyî la reyna zî o şi koyan. Dima ke o şi leşkeran tim eştêne keyeyê ma ser û lajê mi persayêne. Ma tedaya leşkeran ra keyeyê xo dewe ra bar kerd Erdîş. La reyna zî leşkeran ma aciz kerdêne. Dima ma eşnawit ke lajê mi merdo.''

Dayîke Sabîha ard ziwan ke sayê lajê xo de keyeyê înan kurdayetîye zanite û vat: ''Nê têkoşînî ra verî tedaya tewr girane cinîyan dîyêne. Dima merdiman çimê xo akerdî û ewnîyayîşê xo vurna. Her kes dest pê têkoşînî kerd. Ez venga pêro mayanê hatîye dana ke têkoşîn dewam bikerê. Ma têna haştîye wazenê. Ma wazenê wa zulm biqedo. Heta mergî no waştiş do zerrîya mi de bo. Ez zî wazena haştîye bivîna.''