Fermandara Qerargehê Merkezî yê YJA-Starî Zozane Çewlik beşdara bernameyê taybetî yê Stêrk TVyî bi û serê tecrîdkerdişê Rayberê Şarê Kurdî Abdullah Ocalanî, rewşa şerê Herêmanê Pawitişî yê Medya û serebûtê Xelîfanî de cewab da persanê Arjîn Feratî.

Qiseykerdişê Zozane Çewlik ra tay noqtaya girîngî wina yê:

''Rayberê ma 23 serrî yo binê tecrîdêkê giranî de yo. Nê polîtîkayê şerê taybetî yê Îmraliyî hêzanê serdestan ra cîya nênê ercnayene. Hêzanê mîyanneteweyîyan seba tasfîyekerdişê Rayber Apoyî rolê garantorîye dayo Tirkîya. CPT, Konseya Ewropa, MHME û xeylê dezgehê ke qaşo demokratîk ê vera tecrîdî bêveng ê. Eke îmhakerdişo fîzîkî yê Rayber Apoyî heta nika ser nêkewto no netîceya xoverdayîşê Rayberîye, şarê kurdî û têgêrayîşê ma ya.

Nê kerdişî çarçewa konseptêkê îmha de yenê kerdene; vera şarê ma sîyasetê îmha yeno caardene, zîndanan ra her roje cenazayî vejîyenê. Dewleta tirke erdê Kurdîstanî de qanûnan nêşinasnena. Her ca de hêrişê têkoşînê azadîye kena. Hêrişê vera Rayberîye zî resayî asta tewr berze. Ganî ma tehlukeyî bivînê. Ganî şarê kurdî, cinî, ciwan û dostê ma bizanê ke gefê îmhakerdişê fîzîkî yê serê Rayber Apoyî her wextî ra zafêr o. Gerîlayî Zap, Avaşîn û Metîna de şerêkê pîlî kenê. Gerîlayî tehlukeyî vînenê û zanenê ke weşîya Rayber Apoyî pabesteyê nê şerî ya. Azadîya Rayber Apoyî ancax bi têkoşînî visîyena destî. Eke ma nê rejîmê faşîstî nêrijnê hînî îmhakerdişo fîzîkî yê Rayberîye do bikewo rojdem. Ganî ma ney hol bizanê, tehlukeyî bivînê.

5 mengî yo Herêmanê Pawitişî yê Medya de xoverdayîş dewam keno. Dişmen hêrişanê topyekûnan keno. Verê rejîmî de weçînayîş est o. Rejîmê AKP-MHPyî seba ke weçînayîşan de ser bikewo keno ke nê şerî de ser bikewo. La ê verê gerîlayan de nika ra bin kewtê. Nika her kes hesabê weçînayîşan keno la no weçînayîş do sey ê verênan nêbo. Erdogan seba ke payan ser de bimano eşkeno her çi bikero.

Artêşa tirke rixmê teknîk û metodanê xo yê gemarinan de pêser derbî werdî. Girê Amedîyê de reyna Skorskyê înan visîya war. Hînî ê neçare mendî ke ney îtîraf bikerê. Dewleta tirke Girê Amedîyê de bi hemkarîya PDKyî rayîran virazena. Yanî bi hemkarîya PDKyî wazena Amedîyê bivisna destî. La Girê Amedîyê do bibo gorê dewleta tirke.

Ganî PDK cenazayanê embazanê ma û embazanê ma yê birîndarî bido ma. Xelîfan û Gelîya Balîsanî sînorê PDK û YNKyî de yê. Destpêkê serebûtî de pêşmergeyî şinê herême. Herêma wina qije û sivîlan de dewleta tirke senî eşkena hewayî ra hêrişê embazanê ma bikera? No hetê ajananê PDKyî ra ameyo kerdene. Ma zanenê ke koordînatê embazanê ma ajanan dayo dewleta tirke. Tay selahîyedaranê PDKyî vat 'Nê serebûtî de sûcê ma çin o, ma tede çin ê.' O çax şehîd û birîndaranê ma, bidê ma. Ma 5 mengî yo vera îşxalê Başûrî têkoşîn kenê. La heyf ke PDK bi destê xo Başûrî dano dewleta tirke. Tarîx do qetî îxanetê PDKyî efû nêkero.

Ma hêzê xo xoverdayîşê gerîlayan ra gênê. No şerê panc mengan mojneno ke cinîyê kurdî senî bi felsefeya Rayber Apoyî şer kenê. YJA-Star sey parî emser zî bi rêxistinî û çalakîyanê xo tewrê şerî beno. Ma nê şerî de bedelê giranî dayî. Seba caardişê armancanê şehîdan ma do hîna zaf têkoşîn bikerê û faşîzmê AKP-MHPyî bin bikerê.''