Fermandarîya Pêroyî ya YPJyî da eşnawitene ke hêrişê hewayî yê dewleta tirke yo ke 3ê teşrîna verên a 2024î de rayîrê Qamişlo-Amûdê de ame kerdene, fermandaranê YPJyî ra Jînda Cûdî şehîde bîye.

Eşkerayîye de nê ameyî vatene:

''Şorişê Cinîyan ê Rojawanî vera herişanê qirkerdişê bi hewayêkê qerardarî dewam keno. Nê semedî ra dewleta tirke ya îşxalkere hêrişanê xo domnena û bitaybetî cinîyan ê şorişgêran hedef gena. Ewro dewleta tirke ya îşxalkere verê çimanê dinya de bi droneyan hêrişê fermandar û şervananê YPJyî kena û eybê mîyanneteweyîyî newera fînena çiman ver.

Fermandare Jînda Cûdî (Xezal Belge) 1985 de Şirnex de keyeyêkê welatperwerî de yena dinya. Babîyê ci Yûsif Belge gama ke 1998 de xebatê Têgêrayîşê Azadîye yê Kurdîstanî rayra berdêne tewrê kerwanê bêmergan beno. Dima ra verê keyeyê Belgeyî semedê tewrbîyayîşê Têgêrayîşê Azadîye beno a. Birayê fermandare Jînda, Firas û Rizgar tarîxanê cîya cîyayan de tewrê kerwanê şehîdan benê. Fermandare Jînda serranê 90yan de tewrê xebetanê ciwanan bena û 2003 de tewrê refanê Têgêrayîşê Azadîye yê Kurdîstanî bena. Wextê Şorişê Rojawanî de verê xo dana Rojawanî, hemleyanê azadîye yê Cezaa, Rebîaa, Mebrûka, Til Koçer, Serêkaniyê, Şehîd Rûbarî de ca gena û tewrê şeranê tewr giranan bena. Wextê şerê giranî de rixmo ke birîndare bî reyna cepheyê xoverdayîşî canêverdena.

Servan û fermandarê YPJyî yê ke vera DAÎŞî  şer kerd ewro hetê dewleta tirke ra bi metodanê namerdan yenê hedefgirewtene. Ma ewro semedê cuyeyêka bianore têkoşîn kenê. No şoriş bi ewladanê tewr erjîyayeyan ê nê welatî ame kerdene û ma do bi qerardarîya roja verêne ya şorişî do ey bipawê. Wa nê ra şikê çewî çînêbo. Wa dewleta tirke nê hole bizano ke ma do qesasê xo bigîrê. Ma do hesabê nê hêrişanê îşxalî bipersê. Ma sere de keyeyê erjîyayeyî yê Fermandare Jînda Cûdî, şarê xoverdayoxî yê Botanî û heme keyeyanê welatperweran rê serweşîye wazenê. Ma soz danê ke ma do xîyalanê embazanê xo bîyarê ca.''

Eşkerayîye de nasnameyê şehîde wina ame parekerdene:

Nameyê Qodî: Jînda Cûdî

Name û Peyname: Xezale Belge

Nameyê Maye: Behiye

Nameyê Pîyî: Yûsif

Tarîx û Cayê Şehadetî: Amûdê-Qamişlo / 03-10-2024