Fermandaranê Qerargehê Merkezî yê YJA-Starî Hêzile Ozgur hêrişê îşxalî û xoverdayîşê gerîlayan ercnayî. Qiseykerdişê Fermandare Hêzile Ozgur ra beşêk wina yo:

''Ma cara texmîn kerdêne ke dewleta tirke do vera xo bida îşxalê Herêmanê Pawitişî yê Medya. Çunke dima ke înan masaya prosesê çareserîye rijnaye bire daye ke gerîlayan çin bikerê.

Tewirê Îmraliyî yê Rayberîye tewirê serfîrazî yo. Şertanê ke ey awan kerdî têgêrayîşê ma aver berd û têkoşîn kerd pîlêr.  Şarê kurdî sayê nê têkoşînî de Şorişê Rojawanî kerd û gerîlayan xo newe ra aferna. Tek derdê îqtîdarê AKP-MHPyî dewamkerdişê îqtîdarê înan o coka seba rayan prosesê çareserîye da destpêkerdene. Şarê ma wextê prosesê çareserîye de rîyê înan dî.

Artêşa tirke ya îşxalkere 2015 de pê destekê NATOyî xo aver berd, sîstemê NATOyî girewt û bi nê hawayî waşt ke gerîlayan çin bikera. Artêşa tirke bi taybetî verê xo da Başûrê Kurdîstanî ke  Herêmê Pawitişî yê Medya tede yê. Ma 6 serrî yo vera nê teknîkî şer kenê. Operasyonê Zapî yê 2015-2016î, operasyonanê Garê û Heftanîn de dîya ke artêşa tirke vera xoverdayîşê gerîlayan bêçare ya. Ney zî maskeya AKPyî arde war. AKP nika pê şovenîzmê neteperwerî keno ke îqtîdar de bimano. Înan taxmînê ma yê hêrişan raşt kerd ke xîret kerbi debikewê Garê. Ê Garê de rezîl bîyî nika kenê ke xo bixelisnê. La bîlançoya şerê nikayênî mojnena ke hewesê înan ê serkewtişî raşt nêbi.

23ê nîsane de înan hêrişê Avaşîn, Zap û Merîna kerd û armanc kerd ke debikewê Başûrî. Armancê înan o esas Başûr de cabîyayîş o. Bi hezaran leşkerî seba nê armancî tewrê operasyonî bîyî. La gerîlayî rixmê teknîkê înan zî xo ver danê. Têna Girê Pîramîdî de înan faturayêka pîle daye. Ma zanayêne ke operasyonî ra verî înan dormeyê qereqolê Bîlîcanî kerd hîra, nêweşxaneyê xeyme ronayî.

Roja verêne ra nata îşxalkerî raştê xoverdayîşê pîlî yê gerîlayan yenê. Înan Mamreşo de îşxalkeran seba ke debikewê mewzîyêke 5 teyara û 11 helîkopterê hêrişî erşawitî, 35 reyî leşkerî ardî war û peynî de gazê kîmyewî xebitnayî. La 10-11 rojî nêeşkayî debikewê mewzî. Embazanê ma bi xurtî xo ver da. Eke îşxalkeran metodê namerdî nêşuxilnayêne do nêeşkayêne bikewê a mewzî.

Îşxalkeran gazê îsorî û kîmyewî xebitnayî, heta benzîn eşt zere. Embazanê ma pê tecrubeyê Garê tedbîrê xo girewtî û 10 rojan xoverdayîş wina dewam kerd.Tewr peyêne embazanê warê Mamreşoyî vat ke îşxalkeran gazê kîmyewî şuxilnayî dima zî têkilîya ma birîyaye. Girê Pîramîdî de tîma ma ya bi çar kesan îşxalkerî tarûmar kerdî, Mamreşo de tîma ma ya bi 7 gerîlayan mewzî pawite. Kerdişê artêşa tirke sûcê merdimîye yê.

Mamreşo de artêşa îşxalkere vera gerîlayan bin kewte. Înan Mamreşo de seba mewzîyêke 5 teyarayî, 11 helîkopterî erşawitî, 37 reyî leşkerî ardî war, 9 reyî hêriş kerd, 3 reyî gazê kîmyewî xebitnayî. Vera nînan hêzanê ma 18 çalakîyê gerîlayan, 11 çalakîyê sabotajî kerdî, 2 helîkopterê skorskyî derbe kerdî, 21 îşxalkerî ceza kerdî.

Dişmen Mamreşo, Zap, Ertûşî, Girê Şehîd Serxwebûnî, Qela Bedewê, Mervanos û Nêrwe de raştê xoverdayîşê bêhempayî yê gerîlayan mend. Îşxalkerî nêeşkê Nêrwe ra wetêr şorê. Eşkera bi ke teknîk pê ruhê fedayî yê Apogîrîye nêeşkeno. Ma do sozê xo yê azadîye bîyarê ca. Ez embazanê ma yê şehîdan bi minet û rêzdarî yad kena. Wa şarê ma û cinîyî pê şik nêkerê ke ma do operasyonan pûç bikerê û ser bikewê.

Roja verêne ya operasyonan ra nata gerîlayê YJA-Starî bi xurtî tewrê çalakîyan benê. Embaza ma Ekîne Tîloraya ke verî a pê hêrişanê Mervanosî hesîyaye û cade dest eşt doçkaya xo, çimeyê moralî yê embazanê xo Rûken û Sara azametîya cinîya kurde eşkera kerde. Reyna  Zap de tewirê fermandaran Vîyane û Delale gerîlatîya YJA-Starî eşkera keno. Gerîlayê YJA-Starî pê beşdarîya Hemleya Bazanê Zagrosî hêzê xo îsbat kenê. Ma sey Bazanê Zagrosî yê YJA-Starî soz danê şarê xo û cinîyan ke ma do xo ver bidê û ser bikewê.

Êyê ke vera nê hêrişanê îşxalî bêveng manenê kerdişanê dewleta tirke meşrû kenê. Nê operasyonî ma rê newe nîyê, ma musayeyê ci yê. Ma zaf bedelî dayî la ma ameyî heta nê rojan. Çunke dewaya ma meşrû û heqdar a û bingeyê ci de waştişê şarî estê. Coka ganî Bexdad û hukmatê Herêma Kurdîstanî bêvengîya xo war verde. Eke artêşa tirke debikewa Başûrî hînî nêvejîyena.

Şarê ma yê Başûrî zî na bêvengîya hukmatî ra şermayena. Ma sey gerîlayan heta peynî şarê xo reyde şer bikerê. La nê hukmatî do senî biewnê rîyê şarê xo ra.  Wa şarê ma yê Başûrî vera nê tewirî vengê xo berz bikero û seba afernayîşê erjanê neteweyîyan aktîf bibo.

Dewleta tirke wazena pêro parçeyanê Kurdîstanî de destkewteyanê kurdan çin bikera û qirkerdişê komkî bikera. Coka têgêrayîşê ma vera ney vat 'Wext wextê azadîye yo.' Gerîlayê HPG û YJA-Starî bi qerardarî rayberîya Hemleyanê Cengê Xabûr, Bazanê Zagrosî û Wextê Azadîye kenê.

La sere de cinî û ciwanî wa pêro kurdî mevajê 'korona, qedexe, teda, zulm, tepiştiş' û pê ruhê têkoşînê 40 serran tewrê xoverdayîşî bibê û nê îqtîdarî birijnê. Wa ciwan û cinîyî pabeyê fermanê çewî mebê û şaristananê Kurdîstan û Tirkîya îşxalkeran rê bikerê cehenem. Ganî ma vera qirkerdişê kurdan xoverdayîşê topyekûnî bikerê.

Rayberîye wexto ke kewte rayîr vat 'Ey cuye! Ya ez bi azadî to ciwîyena yan zî seke tewr nêciwîyaya hesibnena.' Ez pê bawer a ke perwerê Rayberîye vera nê hêrişanê îşxalî bêveng nêmanê. Ez her kesî rê serkewtiş wazena.''