Festîvala Zîlane hezîrane de Frankfurt de ya

Festîvala Cinîyan a Zîlana ke her serre bi hawayêkê tradîsyonkîyî yena kerdene, emser do 18ê hezîrane de Frankfurt de bêra kerdene.

Festîvala Cinîyan a Zîlane ya 16ine emser 18ê hezîrane de dest pêkena ke hetê cinîyan ê kurdîstanijan ê Almanya ra serkêşîya YJK-E de yena serûberkerdene.

Festîvale 18ê hezîrane de şaristanê Frankfurtî yê Almanya de, adresê Frankensteiner Str. de do bêra kerdene. Festivala ke janî ra 3 serrî yo nêamebî kerdene wina pawîyeno ke emser xeylêk cinîyî tewrê ci bibê.

Komîteya Amadekarîye bi eşkerayîyêke da zanayene ke emser  festîvale bi şîarê 'Xo ver bidê, xo rêxistin bikerê, azad biciwîyê' yena kerdene. Eşkerayîye de bale ameye antene xoverdayîşê gerîlayanê Zap û Avaşînî yê vera hêrişanê dewleta tirke û ame parekerdene ke cinîyî wayîrê xoverdayîşê gerîlayan vejîyenê.

Komîte vat: ''Ma venga pêro cinîyan ê kurdan ê Almanya, rêxistinanê cinîyan, femînîstan, çepgîran danê ke tewrê festîvala ma bibê. Bernameyê ma de deyîrê kurdkî, koma folklor û govende, xeyma kincanê neteweyîyan, standê cinîyan ê hunermendan est ê.''

Festîvala Cinîyan a Zîlane reya verêne 2004 de amebî kerdene.