Bajarê Morlaixî yê Fransa de Festîvala dinyayê bînî ya Zehra Dogane ke roja dîyine de ya û do heta 21ê teşrîna verên dewam bikera. Festîvale de bi viraştişê sergî, konser, kombîyayîşî ya pîya do fîlmî zî bêrî ramojnayene.

Beşa festîvale ya vizêrî de sîyasetmedarê kurdan Faysal Sariyildizî qisey kerd.

Sariyildizî hêrişê dewleta tirkî yê vera Cizîrî de vist vîr û wina va: “Dewleta tirkî verê çimanê dinya de Cizîr de sûcê merdimîye û şerî kerdî. Hêrişê Erdoganî yê vera kurdan de ewro zî dewam kenî. Nê hêriş û qetlîaman rê bêvengmendiş tarîxê merdimîye de do sey eybêko girde cayê xo bigîro.”

Çarçewaya festîvale de herêma Brotonya de bajarê qijî sey Saînt Martîn des Champs, Plouezoc’h, Plougonver, Lanmeur, Plourîn Morlaîx, Kerguerwen û Brestî de aktîvîteyî yenê viraştene û xeylê kafe û restorantan de zî paştî dîyena ci.

Nameyê komîteya festîvale ra bi eşkerayîyêke ame vatene ke Zehra Dogane hem bi xebatanê xo yê rojnamegerîye, hem zî resmê ke virazena , karanê erjayeyan kena. La dewleta tirkî naye sey sucêk hesibnena û Dogane zîndan de sey rehîne tepişena.

Festîvale de eserê Dogane yê verên û yê ke zindan de viraştê yenê ramojnayene.