Rayberanê Têgêrayîşê Cinîyan ê Kurdan û PKK’yî ra Sakîne Cansize, temsîkara KNK’yî ya Parîsî Fîdan Dogane û endama Têgêrayîşê Ciwanan ê Kurdan  Leyla Şaylemeze 9’ê Çelê ya 2013’yî de paytextê Fransa Parîs de ameyî qetilkerdene. Semedê vîrardişê nê hîrê cinîyan ê şorişgêran Swisre de festîvala ke her serre bi hawayêkê tradîsyonkîyî yena viraştene emser 16’ê Hezirane de do bêro viraştene.

Xoverdayîşê Cinîyan Keno Azad

Festîvala ke rayberîya Yewîya Cinîyan ê Kurdî yê Swîsre de bi slogana, ‘Xoverdayîşê cinîyan keno azad’ yena viraştene organîzasyonê ci de xeylî cinîyê welatanê cîya-cîyayan ca gênê. Seba ke 14’ê Hezîrane de Swîsre de Grevê Cinîyan ê Neteweyîyî yena viraştene, festîvala emserî goreyê seranê bînan hîna muhîm a. Bi desan cinîyê ke organîzeyê festîvale de ca gênê  waştişê înan oyo ke xoverdayîşêko bi rengê cinîyan dinya de berz beno festîvale ramojnê.

Programê Festîvale Zaf Bireng o

Festîvala ke 16’ê Hezîrane saet 11.00 de Kasernenareal ê Zurîhî de yena viraştene amadekarîya programê ci temam bîyo. Festîvale de hetêk ra sere de jineolojî derheqê babetanê cinîyan de xeylî panel û semînerî, hetêk ra zî  aktîvîteyê kulturkî û hunerkî do bêrê viraştene. Reyna xeyma otantîk a Kurdî de kulturê Kurdan do bêro nasdayene û denbejî deyîranê xo vejê. Semedê domanan zî do aktîvîteyê taybetî bêrê viraştene. Projeyê JINWAR’î yo ke Rojawan de ameyo înşakerdene do o zî bidîyo naskerdene. Festîvale de do hunermendê sey Pinar Aydinlare, Nûarîne, Zhala Share, Kimgo Sasa vejîyê sehne û ekîbê  kulturanê cîya- cîyayan ê reqis û folklorî zî festîvale de ca bigêrê.

Xoverdayîşê Cinîyan Hempar o

Temsîlkaranê Têgêrayîşê Cinîyan ê Kurdan ra  Meyda Botane bale ante serê xoverdayîşê cinîyan û vat: ‘’Rayberîya Leyla Guvene de xoverdayîşêk ame dayene û  ser kewt. Ruhê nê xoverdayîşî do morê xo bidê Festîvala 16’ê Hezîrane ro. Hetê bînî ra zî 14’ê Hezîrane de Swîsre de Grevê Cinîyan ê Neteweyîyî yeno viraştene. Na çalakîye vera nêheqîya ke cinîyan rê yena kerdene serwedartiş o.  Organîzekerdişê na çalakîye de ma cinîyê Kurdan zî ca gênê. Xeylî sazîyê cinîyan ê ke na çalakîye organîze kenê, organîzekerdişê Festîvala Sakîne Cansize de zî ca gênê. Ma eşkenê vajê ke waştişê heme  cinîyan yew o. Heqê heme cinîyan yenê binpaykerdene û vera naye  ma vanê ke reng, ziwan û nasnameyê ma cîya bî zî mucadeleyê ma hempar o, ganî hempar bo. Festîvale do bi nê ruhî bêro viraştene. bi  vatişê kilmî ma cinîyî zanê  û vanê kê;  xoverdayîşê cinîyan keno azad. Xoverdayîşê cinîyan nuqteya bingêyene ya mucadeleyê cimatkî ya.’’