Unîversîteya Rojawanî ya  Qamişloyî de Forumê Şorişê Cinîyan ê Rojhelatê Mîyanênî yeno kerdene. Frorumo ke hetê Kongreya Star, Meclîsê Cinîyan ê Rojawanî, Akademîya Jineolojî, Yewîya cinîyan ê Suryanîyan, Komeleyê Cinîyan ê Zenûbîya û YPJyî ra ame organîzekerdene xeylêk cinîyê sîyasetmedarî tewrê ci bîyî.

Forum de derheqê xoverdayîşê şehîdanê Şorişê 19ê Temmuze de sînevîzyon ame mojnayene û mesajê ke cinîyan cayanê cîya cîyayan ê Rojhelatê Mîyanênî ra şawitî, ameyî wendene. Vervatoxa Koordînasyonê Kongra Starî Remzîye Mihemed vat: ''Cinîyan ke serkêşîya şorişî kerd, heme waran de estbîyayîşê xo mojna. Heme dezgehan de mîyanê sîstemê hemserekîye de ca girewt û dinya rê bîyî nimûne.''

Dima Endama Heyetê Hemserekîye yê PDYî Foza Yusif qisey kerd. Foza Yusif vat ma pê sereberz ê ke ma ewro tîya destkewteyanê cinîyan ê Şorişê Rojawanî ser o qisey kenê. Yusife bale ante rewşa peyêne ser û qiseykeridşê xo wina domna:  ''Dinya rîyê zîhnîyetê camêrdê serdestî yo ke hetê sîstemê kapîtalîstî ra ame averberdene, dinya wextê tengî ra ravêrena. Rojhelatê Mîyanênî de şero giran est o. Bi seyan cinî û domanê multecîyî çolan de yê.  Rejîmo kapîtalîst ewro vera şaran polîtîkayanê qirkerdişî rayra beno. No rejîm wazeno ke destkewteyanê şaran çîn bikero.  Her roje bi şerê bîyolojîkî yewna jan yeno keşfkerdene û feqîrîye zêdîyena. Waştişê nê şeran kontrolkerdişê îktîdarî yo. Ukrayna de hîrê mîlyonan ra zafêr kesan bar kerd. Şerê des serran ê Sûrîye de bi se hezaran kesan bar kerd û bi seyan kesî ameyî qetilkerdene. Nê rejîmî dewlete rijna. Lîbya de pêkewtişî dewam kenê. Lubnan de vêşanîye est a. Hetê bînî ra Iraq hema hukmat ronênayo û Afganîstan de nizdê hewtay serran o gonî rişîyena.  No rîyê raştîye yo.''

Yusife bale ante hêrişanê vera Rojawanî ser û vat: ''Dinya hewceyê şoriş û sîyasetê newî ya. Coka ma vanê Şorişê Rojawanî şorişê cinîyan o. Ma ewro pê projeyê cinîya azade û neteweya demokratîke mesaj da dinya. Coka nê şorişî eleqeya heme dinya ante xo ser. Şorişê cinîyan serkêşîya cinîyan ê kurdan de pîya bi heme cinîyan ê Mezopotamya wazeno nê zîhnîyetî bibedilno. Şorişî bi jineolojî xeylêk perspektîvî afernayî. Bi wesîleya serrgêra 10.  Ya şorişê wayîrê nê fikrî Rayber Abdulah Ocalano ke 23 serrî yo zîndan de xo ver dano, selam kenê.''

Foza Yusif vat: ''Hêzê ke gonî sipenî fikranê ma ra tersenê. Coka ganî ma semedê şerêkê girdî amadekarîya xo bikerê. Ganî ma vera tehdît û hêrişan şorişî bipawê. Senî ke ma bîyî serkêşê cinîyan ê dinya ganî ma şorişê cinîyan zî xurtêr bikerê. Ma semedê pawitişî xo aver bêrê. Ma xo mexapînê.  Wa her cinî semedê çeke amade bo. Ma ruhê xo pê azadîye pirr bikerê. Bê pawitişî azadîye nêbena. Wa rewşa cinîyan ê Efrîn, Serêkanîyê û Afganîstanî tim vîrê ma de bo. Ganî ma têkoşînî pê metodanê pîsporan xurt bikerê. Ma hêzdar ê, paştîya ma ma ra pêt a. Na seserre do bibo seserra azadîya cinîyan û şaranê bindestan.''