Colemêrg, Wan û Şirnex de çeteyanê fuhuşî yê ke leşker û qoricîyan ra yenê meydan, xeylêk cinîyî bi rayîrê şantajî vistî nîyanê fuhuşî. Zorbazîya çeteyanê fuhuşî ra cinîyêke kişîyaye, cinîyêke neçare mende ke xo bikişa û cinîyêke zî bi hawayêkê şikdarî merde. Derheqê tehqîqatê çeteyanê fuhuşî de zî bira 'bêteqîbîye' dîyaye.

Wekîla HDPyî ya Wanî Muazzeze Orhan pare kerd ke êyê ke çeteyê fuhuşî awan kerdî wayîrê a hişmendîya nîjapereste yê ke serrî verî seba kurdan vatêne 'Herinda ke bibê terorîstî wa fuhuş bikerê, kundox bişuxilnê.''

Orhane îfade kerd ke Colemêrg de fuhuş metodêkê şerê taybetî yê dewlete yo û vat: ''Polîtîkayê şerê taybetî pê rayîrê narkotîk, fuhuş û ajanîye şaristananê Kurdîstanî ra yenê vilakerdene. Serebûtê remnayîşî, kişîyayîşê cinîyan û mergê şikdarî wina yeno mojnayene ke seke rayêke qewimîyenê. Xeylêk serebûtî netîceyê polîtîkayanê şerê taybetî yê. Cinîyan rê bi rayîrê şantajî, gefê tecawuzî yenê kerdene, ajanîye yena ferzkedene. Bi nê hawayî yeno armanckerdene ke komel bêro teslîmgirewtene. Xora cinîyê kurdî vera ney têkoşîn kenê. Ma do zêdêr xo rêxistin bikerê, wayîrê xo, komelê xo û erjanê xo vejîyê û pê têkoşînî wurzê payan ser.''

Aktîvîsta femînîste Zozane Ozgokçe zî derheqê zêdîyayîşê fuhuş û kondoxê Wanî de wina vat: ''2004 de Wan de cayo fermî yê fuhuşî qefilîya. Wan de pavyonî zî zêdîyayî. Dewlete xora nê çîyan zanena. Dewlete pê cinîyan ê kurdan fuhuş kena. Zanîyeno ke kam fuhuş dano kerdene. êyê ke do nê çerxî bişiknê camêrdê herême û rêxistinê komelê sivîl û sîyasî yê. Hayîya ma pê cinîyan esta. Seba  cinîyanê ke raştê tedaya fuhuşî yenê ganî karêko taybet bêro kerdene. No babetêka zaf hesas a.''