Fermandaranê Qerargehê Merkezî yê YJA-Starî ra Şerda Mazlum Gabar derheqê kombîyayîşê Konseya HPG û YJA-starî de, asta têkoşînê gerîlayan a 2021yî, amadekarîya vera hêrişanê dewleta tirke û mefhumê 'gerîlayanê kuantumîkan' de ANFyî rê qisey kerd.

Qiseykerdişê Gabare ra beşêk wina yo:

''Şerê 2021î şerêko germin û çetin bi. Ma kombîyayîşê Konseya Fermandarîyanê HPG û YJA-Starî de no şer ercna. Ma kombîyayîş de bi taybetî tecrîdê Îmraliyî ser de vindertî. Dişmenî vatêne ke no zimistan do bibo peynîya ma. La 2021 de gerîlayan pê çalakîyanê xo nêverda dişmen nefes bigêro. Gerîlayan Zap, Metîna, Xakûrkê û Avaşînî de derbê giranî dayî dişmenî ro. 

Vakurê Kurdîstanî de dişmenî 8 hezar operasyonî kerdî la tira netîceyêke nêgirewte. Vera Herêmanê Pawitişî yê Medya 342 hêrişê hewayî ameyî kerdene. Dişmenî hêrişanê kîmyewîyan de bi namerdî embazê ma şehîd kerdî. Gerîlayan pê îrade, bawerî, heskerdiş û perwerîya xo hêrişê dişmenî kerdî pûç.

Ma kombîyayîşê Konseye de bire girewte ke vera hêrişanê dişmenî şerê şarî yê şorişgêrî bikerê, vera hêrişanê Rayberîye xeta Zîlane de tewir bimojnê, şerî aver bibê. Ma qerardar ê ke serra 50. ya PKKyî bikerê serra serfîrazîye. Coka ma şerê şarî yê şorişgêrî hîna bi xurtî û xorinî bîyarê ca. Ma bingeyê şerê şorişgêrî yê şarî de kenê xo bivurnê. Xora kêmasîyê ma est ê, ma hema nêresayî hedefê xo. Sebebê ney zî raştîya komelê kurdan a. La oyo girîng no yo ke merdim xetayanê xo ra dersan bigêro.  Ma artêşa gerîlayan sey artêşa fedayîyan pênase kenê. Coka ma eşkenê vajê ke tewirê ma zî ney ser o şiklêk gêno. Ma 2022 de hedef kenê ke xo hîna aver berê, warê stratejîkî de şerê xo û asta fermandarîye xo bihêz bikerê. Tewirê ma yê fermandarîye xo rê perwerdekerdiş, pratîzekerdiş, averberdiş û xebatanê bidîsîplînan esas gêno.

Başûr de operasyon nê îşxal est o. Bi zelalî werte de yo ke PDK hemkarê nê hêrişanê îşxalî yê dewleta tirke yo. Xora mal û mulkê Barzanîyan eşkera kenê ke PDK ho xo roşeno. PDK do pê nê nêzdîbîyayîşî peynîya xo bîyaro û cara yew faydeyê ci Başûrî rê çin o. Tarîx do xo reyna dibare bikero çunke avantaj destê gerîlayan de yo. Ewro şero taybet reyna dewre de yo.

Yew felsefe û ferasetê gerîlatîye est a. Gerîlatîya nê dewrî hêzê xo marîfetanê yew gerîlayî/ye ra gêna. No zî seba serkewtişî bi xo qîm nêkeno. Gerîlatîye de esasanê tewr girîngan ra yew krîterê nedîyarîye yo. Gerîlatîya kuantumîke (gerîlatîya dewrê neweyî) de no krîter zaf muhîm o. Çunke gerîlatîya nedîyarîye tim kewena destê dişmenî. Gerîlatîye de pêro xebatî wayîrê yew mana û erjî yê. Hêzê ma yê pawitişî Kurdîstan de her cade ganî rêxistinbîyayîş xo rê esas bikerê û yew warî de têna şer mekerê. Ganî tempoyê şerê şarî yê şorişgêrî hîna zaf bibo. Ganî çalakî û terzê têgêrayîşî de gerîlayî afernayox bibê. Ganî gerîlatîye bi ruhê yewîye bêra kerdene. Gerîlayî seba serkewtişê qetîyî kamyew taktîk hewce keno ganî înan bikerê. Tesîrê perperîkî yê Kuantumî netîceyanê pîlan do bîyaro. Gerîlayî ganî esasê felsefeya kuantumî de bala xo bi temamî bidê armancê xo. Gerîlatîya kuantumîke eql, marîfetanê gerîlayan hîna zaf vejena werte. Reyna gerîlatîye de embazîye û perwerîya bi partîye zaf girîng ê.

Seke ma tîya de xîret kenê ke qala ci bikerê; 2022 de hêzê ma yê gerîlayan do koyan, şaristanan û gelîyan de, hamnan û zimistanî de do mîyanê xoverdayîşêkê kuantumîkî de bibê.''