Endama Koordînasyonê KJKyî Besê Erzîncan ANFyî rê tecrîd, xoverdayîşê gerîlayan û babetê bînî yê rojdemî ercnayî.

Qiseykerdişê Erzîncane ra beşêk wina yo:

''Tecrîdê Îmraliyî teşwîqê kapîtalîzmî yo. Fikrê Rayber Apoyî cuya newîye, Konfederalîzmê Demokratîkî, Neteweya Demokratîke pêşkêş kenê. Fikrê Rayberîye hêdî zêdêr tesîrê dinya kenê, vila benê û yenê tesdîqkerdene.

Herêmanê Pawitişî yê Medya de vera artêşa tirke şerê xopawitişî yo pîl yeno kerdene. Gerîlayî vera teknîkî, helîkopteran û gazê kîmyewî xo ver danê. No şer astêşbîyayîşê cinîyan ê YJ-Starî zî temsîl keno. Gerîlatîya modernîteya demokratîje rayberîya cinîyan de qewimîyena. YJA-Starî resaya asta hişmendî û îradeyê cinîyan.

Dewleta tirke pê hêrişanê vera Şingalî wazena êzidîyan bitersna, înan bikera kole û meverda ke êzidîyî xo îdare bikerê. Ganî şarê ma yê êzidîyî xo rêxistin bikerê, yewîya xo bîyarê ca û vera nê hêrişan xo ver bidê. Şar û cinîyê êzidîyî ganî wayîrê Îdareyê Xoserî yê Şingalî vejîyê. Azadîye pê xoîdarekerdiş û xopawitişî bena.

Dewleta tirke hêrişê vera Rojawanî zî zêdînayî. Nê hêrişî a raşte vera modelê îdareyî yê Rojawanî yenê kerdene. Çunke uca de pê sîstem û felsefeya Rayberîye îdareyêk ronîya. Sîstemê modernîteya kapîtalîste wazeno nê îdareyî ra bixeliso, ey bivurno. Sîstem pê kontrolkerdişê Rojhelatê Mîyanênî û Kurdîstanî wazeno emrê xo derg bikero la a raşte rew ra rijîyayo.

Amerîka cinîyê afganî destê Talîbanî de ver dayî û Afganîstanî ra vejîyaye. Înan wexto ke Afganîstan îşxal kerd îdîa kerd ke 'ê do cinîyan azad bikerê.' La eqsê ci qewimîya. Sey pêro dewletan Amerîka zî wayîrê hişmendîya serdestîya camêrdan a. Coka cinîyî wa tira çîyêk nêpawê. Cinîyî ganî rêxistinîya xo, sîstemê xo yê pawitişî, îtîfaqê xo ronê û sîstemê xo awan bikerê. Na babete de wa cinîyê afganî xo rê cinîyanê Rojawanî mîsal bigêrê. Ganî cinîyê kurdî semedê cinîyan ê afganan mesuldarîya xo bîyarê ca.

Ma do seserra 21. bikerê seserra azadîya cinîyam. Eke ma rêxistinîya xo xurt bikerê ma eşkenê kaos û krîzî ra bixelisê. Îmkanê ma her wextî ra zêdêr ê. Rayberê ma 23 serrî yo tecrîdkerde yo, ganî ma verî çarçewa Hemleya Wextê Azadîye de azad bikerê. Nê esasî ser o ez venga şarê ma, cinîyan, ciwanan û dostan dana ke bi xurtî wayîrê Rayberîye vejîyê. Azadîya Rayberê ma azadîya cinîyan a.

Ez venga rêxistinanê cinîyan, meclîsanê cinîyan, sîyasetmedaran ê cinîyan, akademîsyenan ê cinîyan danê ke yewîya xo, rêxistinîya xo pîl bikerê. Meclîsanê xo, komunê xo awan bikerê. Cinîyî ganî her ca de rêxistinbîyaye bibê. Ma metodê karî yê burokratîk û elîtî war verdê. Modelê rêxistinbîyayeyî bifikirê ke her kesî rê şino. Coka ez venga pêro cinîyan dana ke têkoşînê xo pîl bikerê. Ma do qetî ser bikewê. Ez nê têkoşînî de pêro cinîyan rê serkewtiş wazena.''