Rojnamegere û dîrektora îtalyane Benedetta Argentieri Festîvala Fîlman a Mîyanneteweyî ya Kolnî de xelata 'Phoenixî' ya ke dîyabî fîlmê aye yê dokumenterî 'Matchmaker' dîyarîya şarê Rojawanê Kurdîstanî kerdbî. 'Matchmaker' de qala cinîyanê ke tewrê DAÎŞî bîyê yena kerdene.

 Benedetta Argentieri beşdara Konferansê Cinîyan ê Mîyanneteweyî yê Yewine û Diyînî zî bibî. Benedetta Argentieri qala ci kerde ke konferansê diyînî de aye dî ke hînî têgêrayîşê cinîyan ê pêro dinya bala xo danê têgêrayîşê cinîyan ê kurdan û Kurdîstanî.

Benedetta Argentieri bale ante ser ke Ewropa û cayanê bînan ê dinya ra cinîyê ke tewrê DAÎŞî bîyê nêeşkenê abigêrê welatê xo û vat: ''Welatê înan ameyîşê înan qebul nêkenê. Coka bara nê cinîyan zî ha milê Îdareyê Xoserî de ya. Nika Rojawan binê hêrişanê dewleta tirke de yo la Ewropa hemwelatîyanê xo Rojawan de verdena. No bi taybetî vera Rojawanî tehlukeyêko pîl o. Coka mi xelata xo dîyarîya şarê Rojawanî kerde. Mi waşt ke bale bianca meseleyanê Rojawanî ser.''

Benedetta Argentieri hêrişê kîmyewîyî yê dewleta tirke vist vîrî û vat: ''Dewleta tirke seba ke gerîlayan çin bikera qanûnanê mîyanneteweyîyan binpay kena û çekanê kîmyewîyan şuxilnena. Rixmo ke Tirkîya endamêka NATOyî ya her kes vera nê hêrişan bêveng o. Têkilîya ney bi tecrîdê Ocalanî est a. Ocalan eşkeno meseleyan çareser bikero. La 22 serrî yo binê tecrîdî de yo. Ma nika vînenê ke sloganê 'jin, jiyan, azadî' senî pêro dinya de vila bena. La ganî têkilîya nê sloganî ya bi Ocalanî bêra dîyene. Coka ganî her keso ke dewaya cuya azade keno, çîyoo ke Îmrali û koyanê Kurdîstanî de qewimîyeno bivîno. Hînî wextê ci ameyo ke Birêz Ocalan azad bibo.''