Endama Komîteya Rayberdişî ya PKKyî  Rûkene Garzan  bi wesîleya 25ê Teşrîna Peyêne Roja Têkoşînê Mîyanneteweyî yê Vera Şîdetê Serê Cinîyan ANFyî rê qisey kerd.

Garzane sere de  şexsê wayanê Mirabalan de heme cinîyê ke ameyî qetilkerdene, şexsê Delale Amed, Aze Malazgîrt û Zelîha Toros ê ke aşma teşrîna peyêne de şehîd kewtî heme şehîdê Têkoşînê Azadîye yê Cinîyan û şexsê Hevrîne Xelef û Aynur Ada de şehîdê Xoverdayîşê Anorî yê Rojawanî yad kerdî û sozê caardişê waştişanê înan newe kerd.

Garzane vat: Planê şîdet û zextê vera cinîyan xorî yê. Coka semedê qedînayîşê şîdetî têkoşîno xurt hewce keno. Têna bi qeraranê sembolîkan şîdet werte ra nêno wedartene.  Şîdetê vera cinîyan sîstemkî yo. Sîstemê serdestan tim û tim vera cinîyan o. Hemê sîstemê ke hetê camêrdan ra ameyî ronayene paştî danê yewbînan û vera cinîyan ê. Sîstemo kapîtalîst koletîya cinîyan modern keno û ziraro tewr pîl dano cinîyan. Şîdeto ke vera wayanê Mîrabalan ame kerdene ewro nê ra zafêr vera cinîyan û şarê Kurdî û cinîyan ê kurdan yeno caardene. Îqtîdarê AKP-MHPyî vera kurdan bi serran o qirkerdişanê tewr girdan keno. Ewro verê çimanê dinya de Rojawanî de qirkerdişê înan dewam keno. Erdogan vera cinîyan polîtîkaya herişkare ya teybete ano caardene ke xoverdayîşê cinîyan bişikno. Seba ke şarê Kurdî xeta Rayber Apoyî de têkoşînê azadîye gird keno, îqtîdar bi heme hêzê xo hêriş keno ke nê xoverdayîşî bişikno.

Erdogano faşîst seba ke payra bimano hêriş keno la o bi nê kerdişan emrê xo kilm keno. Na dîktatorîya faşîste do vera xoverdayîşê şaran vîn bikero. Na çarçewe da cinîyî ganî xoverdayîşî gird bikerê. Têna tayî rojan de ney ganî tim û tim semedê girdkerdişê têkoşînî xover bidê. Wezîfeyo esas oyo ke vera koletîye, zordarîye û hem zext û şîdetî cinîyî bi zanayîşê xopawitişî û pawitişê meşrûyî tê bigêrê. Seba ka tarîx de cinîyan xo nêpawit û pawitişê camêrd rê muhtaç mende, cinî zehîf mend. Coka Rayber Apoyî hêzê pawitişê cinîyan sey garantorê têkoşînê azadîye yê cinîyan hesibna. Bê xopawitişî ne azadîye ne garantîya cuya azade ya cinîyan û şaran beno. Ewro şeranê Vakur, Başûr û Rojawanî de yewîyê xopawitişî yê cinîyan aktîf ca genê û têkoşînê azadîye de morê xo danê serkewtişanê girdan ro. Eke cinîyî vera serdatan  hêzê xo bikerê yew û xoverdayîşê xo yê xopawitişî gird bikerê do ser bikewê.‘‘