Vervatoxa Demkî ya TJA Ayşe Gokkan rê bi îdîaya 'îdarekarî û endamîya rêxistine' cezaya zîndanî ya 30 serran dîyabî. Eşkera bi ke semedo ke Gokkane tewra çalakîyanê vera şîdetê serê cinîyan bîye ameye sûcdarkerdene.

Heyetê mehkeme eşkera kerd ke înan eşkerayîyê çapemenîye, karê Kongreya Komelê Demokratîkî, Kongreya Cinîyan ê Azadan û Komeleya Cinîyan a Rosa sey bahaneya cezakerdişî dîyî.

Gokkane 2020 de qezaya Yenîşehîrî ya Amedî de tewra çalakîya 'şermezarkerdişê şîdetê vera cinîyan' bibî. Heyetî tewrbîyayîşê na çalakîye zî sey 'propagandaya rêxistine' mojnayo.

Bahaneya bire de ame parekerdene ke na çalakîye de pankarta bi nuşteyê 'Vera şîdetê camêrd û dewlete wurzê payan ser, hayîya xo bê' ameye akerdene û na pankarte zî sey sûcî ameya ercnayene. Semedo ke Gokkane çalakîye de çekuya 'Kurdîstanî' vata zî ameye sûcdarkerdene.

Mehkeme îdîa kerd ke çalakîyê ke Gokkane tewrê ci bîye 'vera cuya demokratîke gef ê' û cezayî nê semedî ra 'dîyayê.'