Tirkîya û Vakurê Kurdîstanî 'veyvê domanî' zaf ê. Domanê kênayî pê zorî yenê zewijnayen, dergûşan anê û maruzê şîdetî benê. Tay domanî wextê prosesê weledîyayîşî de dinyaya xo bedilnenê.

Gulfere Yendima ke 53 serre ya, domanîya xo de pê zorî ameya zewijnayene û 30 serran mêrdeyê xo Y.C. ra şîdet dî. Gulfere derheqê cu û têkoşînê xo de Ajansê Jinnewsî rê qisey kerd û seba paştdayîşî veng da.

Gulfere da zanayene ke Y.C. tim vera aye û domanê ci yê 6 serrî şîdet kerdêne û vat: ''Ey nêverdayêne ez şora nêweşxane. Çunke nêwaştêne ez raporê derbe bigêra. Axir rojêke mi rapor girewt û derheqê ey de bira 'keyeyî ra dûrî vindero' ameye dayene. La ey reyna zî tim eşt keyeyê mi ser, şîdet kerd. Y.C. 2014 de pê kardî ez birîndar kerda, verî o ame destbendkerdene la dima vera dîya. A serre domanê mi zî yew gurçikê xo vînî kerd.

2015 de mi Y.C. verda. 2016 de ceyran yew domanê mi girewt. Domanê mi dinyaya xo bedilnaye.  Mêrdeyê mi kiftê mi şikitbi coka ez nêeşkena zaf bixebita. Nika ez keyeyêkê prefabrîkî de xebitîyena. Ez ge ge şina, keyeyan kena pak. Mi têkoşînêko çetin da. Poşmanîya ma aya ke mi o ere verda. ''

Gulfere pare kerd ke nika hewa zaf serd o, keweno binê -12 û keyeyo prefabrîk germ nêbeno. Gulfere ard ziwan ke rewşa înan a ekonomîke hol nîya coka nêeşkenê komur û kolîyan bigêrê. Gulfere seba paştdayîş û hetkarîye veng da.