Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya. Rixmo ke Gulîstane Doku ra 605 rojî yo xebere çin a Serdozgerîya Komare ya Dêrsimî tehqîqat qet aver nêberd. 

Dezgehê komelê demokratîkî û keyeyê Dokuyî 'cînayetê plankerdeyî' ser o vindenê la dewlete û dezgehê ci qestî ra serebûtê 'xokiştişî' ser o vindenê.

7ê çeleyê 2020î de verî awbend de xebata cigêrayîşî dîyaye destpêkerdene la xebate 6ê temmuza 2020î de ameye vindarnayene. Waştişê keyeyê Dokuyî ser o 7ê tebaxe de mîktarê awe ame kêmkerdene û xebata cigêrayîşê awbendî newe ra dest pêkerde û 18ê tebaxe de qedîyaye. 15ê teşrîna verêne de xebata cigêrayîşî reyna dîyaye destpêkerdene la bênetîce 23ê teşrîna peyêna 2020î de bi hawayêkê qetî ameye qedînayene.

Dosya de vergûmano verên Zaynal Abarakov o ke babîyê ci polîs o. La têna reyêke îfadeyê Zaynal Abarakovî ame girewtene û qetî nêame destbendkerdene zî.

Babîyê Abarakovî polîs Engîn yucel dima wezîfe ra ame girewtene la hema derheqê ey de zî caardişêk nêame kerdene.