Tirkîya de her roje şîdetê vera cinîyan û qirkerdişê cinîyan zêdîyenê. Rixmê ney zî nêmeyê şewe hukmatê AKP-MHPyî Peymana Îstanbulî wedarite.

Wekîla HDPyî ya Îstanbulî Avûkate Zuleyha Gulum ANFyî rê derheqê Peymana Îstanbulî, şîdetê vera cinîyan û hêrişê vera destkewteyanê cinîyan de qisey kerd.

Gulume vist vîrî ke Peymana Îstanbulî binê pawitişê Meclîsî de bîye û heqê Serekkomar Erdoganî çinbi ke bi sereyê xo peymane fesh bikero. Gulume vat: ''No zî mojneno ke hînî nê welatî de demokrasî nêmenda. Yew hukmê feshkerdişî yê Serekkomarî çin o. Wedaritişê Peymana Îstanbulî nîşaneyê nêzdîbîyayîşê hukmatî yê vera cinîyan o. Hukmat bi nê hawayî şîdet û qirkerdişê vera cinîyan keno meşrû. Bira feshkerdişî têna camêrdê sûcdarî, cemaat û tarîqatî kerdî şay. Wedaritişê peymane ra nata zî şîdet zêdîya. Çunke camêrdan na bire ra hêz girewt.''

Gulume ard ziwan ke wedaritişê Peymana Îstanbulî ra dima cinîyê mexdûrê şîdetê wexto ke qereqolan rê gerre kenê polîsî înan açernenê, şawenê mehkemeyan û cinîyan nêpawenê. Gulume vat: ''Goreyê qanûnê 6284î ganî hêzê asayîşî serebûtanê şîdetî de cinîyan bipawê, pêro tedbîran bigêrê. Reyna xeylêk camêrdî hînî vanê qey şîdetê vera cinîyan sûc nîyo.  Camêrdî bi hawayêkê eşkerayî medyaya komelkî de cinîyan û endamanê LGBTÎ+ rê gefan wanenê. Camêrdê ke şîdetê vera cinîyan ra ceza girewta vanê qey ê do vejîyê teber. Keyeyê pawitişî, qanûnê tedbîrî, caardişê kadesî nê pêro destkewteyê cinîyan bîyî ke Peymana Îstanbulî reyde ameybî. La nika no binge wedarîyeno û cinîyî vera şîdetî nêpawîyenê.''

Gulume da zanayene ke wedaritişê Peymana Îstanbulî peymananê bînan ê mîyanneteweyîyan pûç nêkeno û vat: ''Peymana Vergirewtişê Cîyakerîya vera Cinîyan (CEDAW) sey Peymana Îstanbulî ya û madeyê ci yê hemparî estê. Reyna Tirkîya neçare ya ke goreyê madeyanê Peymana Heqanê Merdiman a Ewropa têbigêra. Peymanê mîyanneteweyî vera cîyakerîye û şîdetî cinîyan pawenê. Xora ma Peymana Îstanbulî ra qetî fek vera nêdanê. Têkoşînê ma vera hêrişanê serê destkewteyanê ma, cîyakerîya seksîste û şîdetî berdewam o.''