Hemsereka Kongreya Komelê Demokratîkî (KCD) Leyla Guvena ke wekilîya ci ameye xespkerdene û cezaya zîndanî ya 22 serran û 3 mengan dîyaye ci seba grevê vêşanîye yê zîndanan pê mektubêke venga rayaumûmîye da.

Mektuba Leyla Guven wina ya:

''Şarê ma yo ercîyaye,

Ez zîndanê Xarpêtî ra ke Kawayê Modernî Mazlûm Doganî yo û cayo verên ê tepişîyayîşê Sakîne Cansiz o şima bi rêzdarî û heskerdişî selam keno. Dadîyê ke 50 serrî yo nê xoverdayîşî de estbîyayîşê xo yê tewr qîmetînî dayî ez şima rê hûrmetê xo şawena û lew nana destanê şima ro. Dadîyê ercîyayeyî şima cara bedelê ameyoxî dayî. La aseno ke hawarê cigêrayîşê dadîye Berfoye, qîrayîşê Sakîne Arat, dayîke Xalîse û cigêrayîşê edaletî yê dayîke Emîne Şenyaşar muqtedîran rê qîm nêkeno û ê ma rê bedelanê neweyan wazenê. Her ke ê çarenêkerdişî de israr kenê ma hîna benê bihêzêr, dejanê xo kenê binê erdî û benê şaro tewr hişmend ê Rojhelatê Mîyanênî. Çunke ma zanenê ke cuya ekolojîke, demokratîke û azadîwaştoxa cinîyan ha pabeyê ma ya.

Şarê ma yo ercîyaye,

Seke şima zî zanenê Hemleya 'Wext wextê azadîye yo' ha dewam kena. Nêzdîyê 50 mîlyon kurdî qîrenê vanê ke ê bêstatutîye qebul nêkenê. Birêz Abdullah Ocalan vano o 22 serrî yo binê tecrîdêkê giranî de yo la wazeno meseleya kurdan çareser bikero. Êyê ke na mesele ra îstîfade kenê nêwazenê mesele çareser bibê. Zîndanan de bi hezaran tepişteyan 27ê teşrîna peyêne ya 2020î de çarçewa Hemleya 'Wext wextê azadîye' de grevê vêşanîye da destpêkerdene. Zîndanan de tepişteyan rê seba vetişê vengê çareyêka bîne nêmenda. Şarê ma yo ercîyaye û keyeyê ma eşkenê vengê ma bidê eşnawitene. Ma zereyî ra şima teberî ra eke ma vengê xo berz bikerê eşkenê tecrîdî bişiknê. Ê rojî nêzdî yê. Ma pê moral û qerardarîyêka pîle naye rê amade yê. Ma venga pêro şarê xo yê ercîyayeyî danê ke pê xîretêkê pîlêrî wayîrê xoverdayîşê zîndanan vejîyê.

Xarpêtî ra nameyê tepişteyan ê cinîyan ser o Leyla Guven.''