Paytextê Îngîlîstanî London de her serre hetê Meclîsê Cinîyan ê Jîyane ra Festîvala Cinîyan a Zîlane yena kerdene. Festîvala Zîlane ya 19. emser do 30ê hezîrane de bi slogana ''Ma bi Jina Jiyan Azadî ver bi şorişê cinîyan rayra şinê'' bêra kerdene.

Meclîsê Cinîyan Jiyane bi eşkerayîyêke da zanayene ke her hetî ra cinîyî semedê festîvale ameyî dawetkerdene û vat ê do bi deyîranê têkoşînî bêrê têhet û têkoşînê xo rê bidê domnayene.

Hunermendî Kewê, Jala û hunermendê surprîzî do tewrê festîvale bibê. Reyna şaranê cîya cîyayan ra do grûbanê femînîstan ra cinîyî sey qiseykerdoxe tewrê fesîtîvale bibê.

Pîya bi aktîvîteyanê muzik û dansî do ramotişê folklorî, perfomansê def û zûrna, pêramotişê sînevîzyonî  zî do program de cayê xo bîgêrê.  Festîvale de do standê werd û kincan zî bibê. Semedê domanan zî do kreş û aktîvîteyê cîya cîyayî bêrê organîzkerdene.