Wezîrê Karanê Zereyî Suleyman Soyluyî bernameyêkê televîzyonî de Hemsereka Pêroyî ya HDPyî Pervîne Buldan kerdbî hedef. Meclîsê Cinîyan ê HDPyî derheqê babete de eşkerayîyêke daye.

Eşkerayîye de ame vatene ke Suleyman Soyluyî HDP û Hemserekê DBPyî kerdî hedef û wina ame parekerdene: ''Soyluyî Hemsereka ma Pervîne Buldan kerde hedef û heman wextî de Hemsereka DBPyî Salîha Aydenîz zî kerde hedef. Dima zî Serekkomarî talîmat da hukmî û înan rê gef ame wendene. Ma nê hêrişan heman wextî de sey hêrişanê vera cinîyan qebul kenê.

Textê Suleyman Soyluyî ho rijîyeno coka wazeno hedefê şaşî bikero. La xîretê ey nafîle yê. Ma qiseyanê ê kesê ke destê ci mîyanê her sûcî de yo, meşrû nêvînenê. No kes sey Wezîrê Karanê Sûcan xebitîyeno. Ma sey cinîyan her ca de kesanê ke cinîyan kenê hedef, ra hesab bipersê. Peynîya rayîrî asena, şima do şorê.''