Heyetê Îdareyanê Herêmîyan ê Demokratîkan ê Cinîyan DEM Partî Wan de ''Komxebata Îdareyanê Herêmîyan ê Cinîyan'' keno. Pêro hemşaredarê cinîyî tewrê komxebate bîyî. Komxebate do di rojan dewam bikera.

Hemşaredara Wanî Neslîhane Şedal komxebate de xîtabê hemşaredaran kerd û vat: ''Cinîyê kurdî nê prosesî de raştê hêrişanê giranan yenê. Ewro xoverdayîşê cinîyan ê kurdan pêro cinîyan rê beno model ke nameyê nê modelî paradîgmaya ekolojîke, demokratîke û azadîgîra cinîyan a. Ma do şaristananê xo bikerê ê cinîyan.''

Vervatoxa Meclîsê Cinîyan ê DEM Partî Halîde Turkoglu vat: ''Êyê ke çaresernêkerdişê meseleya kurdan de israr kenê, operasyonanê qirkerdişê sîyasîyî kenê. Na rewşe tecrîdê Îmraliyî ra cîya nîya. Ewro tecrîdê Îmraliyî faşîzmî xorinêr keno. Sîyaset bira kinc, govend, cenaza û şînanê kurdan rê mudaxele keno.''

Hemsereka DEM Partî Tulaye Hatîmogullari vat: ''Ma seba sîstemê hemserekîye û têdûştîya temsîlîye zaf bedelî dayî. Ma bi 78 hemşaredaranê xo Tirkîya û Rojhelatê Mîyanênî rê benê model. Ferasetê serdestîya camêrdan wayîrê mezgê îqtîdarperestî yo. Ganî ma nê mezgî ra xo bipawê. Hemşaredarê ma yê cinîyî îradeyê pêro cinîyan temsîl kenê coka ganî ma bi mesuldarî têbigêrê. Ganî ma goş bidê waştişanê şarî û binê tesîrê sînoranê îqtîdarî de nêmanê. Ganî hemşaredarê ma yê cinîyî pratîkê îdareyê herêmîyî pêro cinîyan rê vajê. Ma ganî bi kerdişanê xo ferasetê qeyûmgiran pûç bikerê. 

Vera kesanê ke govende gênê operasyon est o. Wa îqtîdar bizano ke ma do govendanê xo, deyîranê xo û hîsanê xo yê bi ziwanê xo rê dewam bikerê. Şima nêeşkenê ziwanê bi 30 mîlyonan qedexe bikerê. Wa şaredarîyê ma tim bi ziwanê şarê xo xizmet bikerê.''