Hemserekê Şaredarîya Sûrî ya Amedî, ke hetê Partîya Şaran a Demokratîke (HDP) ra qeyûmî ra apey amî girewtene, xebatanê xo domnenê. Hemsereka Şaredarîya Sûrî Fîlîz Bûlûttekîne saetanê rewî yê şodirî de hem cinîyê ke Baxçeyanê Hewselî de bî zîyaret kerdî û hem zî hemwelatijê ke Kuçeyê Hatûn Kastale yê Alî Paşayî de bî zîyaret kerdî. 

 Hemsereke Bûlûttekîne verî zî cinîyanê ke vernîya Goristanê Berê Mêrdînî de sebzeyê Baxçeyanê Hewselî roşenê zîyaret kerdîbî. Cinîyan ê kedkaran cayêko hîna rind ke bieşkê mehsulanê xo hîna bi asanî biroşê waştibi, Fîlîze dawetê Baxçeyanê Hewselî kerdebî. Dawetî ser ra Fîlîze, şîye Baxçeyanê Hewselî û ûca cinîyan dir amî têhet. Wextê pêvînayîşî de cinîyan waştişê bazarî tekrar ard ziwan. Fîlîze derheqê Baxçeyanê Hewselî de cinîyan ra hayîdarîyî girewtî.

 Fîlîze pêvînayîşê xo yê cinîyan de nê vatî: “Ma fikrênê ke cayêk ke şima bieşkê mehsulanê xo hîna asan biroşê û 7 rojê hewteyî de, 4 serrewextan de akerde bimano virazê. Seba ke ma no waştişo ke hetê şima ra resayo ma bi rindî bica bîyarê lazimî mi fikir, vînayîşê şima esto û ganî ma bizanê ke şima cayêko senên wazenê. Ma do wextêkê tewr kilmî de cigêrayîşanê xo biqedînê û şima biresnê bazaro ke şima wazenê.” Fîlîze, dimayo ke cinîyan ê Hewselî dir sohbet kerd şîye serdana cinîyanê ke kuçeyê Hatûn Kastale yê Alî Paşayî de manenê, persê înan û pêşnîyarîyê înan ê çareserî goşdarî kerdî.