Hemsereka PJAKî Zîlane Vejîn îfade kerd ke Îran de vurîyayîşêko demokratîk lazim o û vat: ''Çareserî xete û rayîrê hîrêyîn de ya.'' Vejîne ard ziwan ke seba ameyoxê azadî yê şarê kurdî ê amade yê ke hêzanê kurdan de îtîfaq bikerê.
Hemsereka PJAKî Zîlane Vejîn derheqê serewedaritişê Îran û Rojhelatê Kurdîstanî de û derheqê deklarasyonê înan û KODARî de ANFyî rê qisey kerd.
Zîlane Vejîn îfade kerd ke şaranê Îranî cara tim bi waştişê vurnayîşê rejîmî sere wedaritêne la rejîmê Îranî tim bi şîdetî verê waştişanê şaran girewtêne. Zîlane Vejîn vat: ''La nika şexsê Jîna Emînî de waştişê edalet, demokrasî, têdûştî û azadîye yê şaranê Îranî ziwanan de yê. Serkêşîya cinîyan de şarî şexsê Jîna de wayîrê ameyoxê xo yê azadî vejîyenê. Çunke welatêk de cinîyî azad nêbê çew azad nêbeno. Jîna kurdêke bîye yanî a merkezê serewedaritişê Kurdîstanî ya. Serewedaritişî Kurdîstanî ra dest pêkerd û vilayê pêro Tehran, Tebrîz, Belûcistan û Ahwazî bîyo.
Şarî û cinîyî vurîyayîşan wazenê la rejîm bi şîdetî cewab dano. Wina bawer kena ke şarî rixmê teda zî do apey gamêke nêerzê. Îran de vurîyayîşêko demokratîk lazim o. Ganî rejîm goş bido şaran û vurîyayîşî bîyaro ca. Şarê azerî, ereb, fars, belûcî û kurdî pîya sloganê 'Ma paştî danê pê' vanê. Ganî rejîmê Îranî na raştîya şaran, komelan û cinîyan bivîno û goreyê ci têbigêro.
Ma çareserîya xo sey rayîr û xeta hîrêyîne pênase kenê. Hêzê ke na xete temsîl kenê, bi têdûştî, demokrasî û azadîye wazenê û cephe û îtîfaqê azadî û demokrasî yê. Ma sey PJAKî û KODARî deklarasyonê xo weşanabi û çareserîye nîşan dabî. Ganî qanûno bingeyî yê welatî bingeyê krîteranê demokratîkan de newe ra bêro ercnayene. Estbîyayîş, nasname û pêro komelê etnîk, dînî û kulturelî yê Îranî ganî pê qanûnan bipawîyê. Ganî îdareyê herêmî awan bibê û heqê cinîyan pê qanûnan bipawîyê.
Ganî bêro dîyene ke cinîyan reyde kurdî zî hêzê serkêşî yê nê welatî yê. Şarê Îranî zî çalakîyan de vanê 'Kurdîstan Kurdîstan ti çim û roşnîya Îranî yo' vanê. Azerî û Belucî zî hetê kurdan de yê. Ganî kurdî û partîyê Kurdîstanî na raştîye bivînê û goreyê ci têbigêrê. Ganî naye ser o armanc awankerdişê neteweya demokratîke bibo, yewîye û îtîgaqo neteweyî bibo.
Ma deklarasyonê xo yê bi 11 madeyan de vat ke ganê hêzê kurdî binê alaya Komara Kurdîstanî de bibê yew û têkoşîn bikerê. Ma amade yê ke pê pêro hêzanê xo seba ameyoxê azadî yê şarê kurdî hêzanê kurdan de îtîfaq bikerê.''
