Cinîya şehîdanê xoverdayîşê xoîdarekerdişî yê Cizîre ra Sahîp Edînî Berîvan Edîna ke pîya bi domanê xo yê 3 serre yî tewrê çalakîya Nobeta Demokrasîyî ya Amedî bena semedê xurtkerdişê mucadeleyî veng da.

Kurdistan de domanî hema zereyê dayîka xo de qetlîam, xoverdayîş û mucdeleyî rê şahîdîye  kenê. Sahîp Baran Edîn zî nê domanan ra yew o. Sahîp hema ke zereyê dayîka xo de bi babîyê ci Sahîp Edîn xoverdayîşê xoîdarekerdişî yê Cizîre de şehîd bi.  Sahîp pîya bi dayîka xo Berîvane 33 rojî yo ke Amed de abluqaya polîsan de çalakîya roniştişî de cayê xo gêno. Berîvan Edîne vera qirkerdişê Cizîre û polîtîkaya hêrişkarê yê dewletê yê vera Kurdan dej û hêrsê xo wina ard ziwan û va: ‘‘Vengê Cizîre nêdîya eşnawitene, her kes bêveng mend la ganî nika her cayê Kurdistanî de Kurdî wayîrê îradeyê xo bivejîye û hemverê dêsanê zulmî de vengê xo berz bikerê. No zulmo ke tîya beno wa kes mevajo ke tena tîya  maneno. Siba do dora heme bajar û qezayanê Kurdistanî bêro. Peynîya naye çîn a.  Ganî na bevêngîye bêro şiktene û her kes wirzo payan ser. Vera nê zulmî ganî vengê wayûbirayîye berz bo.  Ma tîya semedê wayîrvejîyayîşê îradeyê xo mucadele kenê. Ma zulmî qebul  nêkenê. Vizêr senî bi mudaceleyî tecrîd ame şiktene ma do bi mucadleyî xespkerdişê qeyûmî zî bişiknê.‘‘