Cinîyan ê têkoşeran ê DYA, Macarîstan, Hirvatîstan û Brîtanya pare kerd ke ê Şorişê Rojawanî reyde yê û hêrişê dewleta tirke yê vera Rojawanî şermezar kerdî. Cinîyan îfade kerd ke nê hêrişî heman wextî de vera azadîya cinîyan ê û vat xoverdayîşê cinîyan ê Rojawanî seba cinîyan ê dinya çimeyêko bifayda yo.

Zsofîa Adam, Rahîla Gupta, Anîta Lunîc, Dr. Johanna Riha û Janete Bîehl ANF reyde qisey kerd.

Aktîvîsta Budapeşteyîje Zsofîa Adam vat: "Ma koyê kurdan ê. Rojawan ameyoxê ma yo. Wexto ke Macarîstan de ma paştî danê Rojawanî ma têna seba qirkerdişê ke Rojawan de benê ra sebeb nêwerzenê payan ser ma seba vîzyonêkê sîstemêkê têdûştîya komelkî û ekolojîkî zî wurzenê payan ser. Ez hetê wayanê xo de ya ke YPJ de şer kenê, sîyaset kenê û îşxal wedarenê."

Nuştoxe, rojnamegere û aktîvîsta heqanê cinîyan Rahîlla Gupta vat: "Wexto ke mi eşnawit mîyanê şert û mercanê bêrehman de vera DAÎŞî cepheyan de şorişêkê cinîyan zîl beno, mi xîret kerd ke nê şorişê rê hetkarî bika. Berpirsîyarîya ma ya sîyasî ya ke ma nêverdê tecrubeyê Rojawanî biqedo."

Zanîngehê Splitî yê Hirvatîstanî ra Anîta Lunîc vat: "Ganî ma xîret bikê ke bibê koyê kurdan ê ke înan pawenê. Çunke ê erjanê ma pawenê. Ganî ma paştî bidê şarê kurdî û her kesî yê ke vera DAÎŞî şer kenê. "

Zanîngehê Cambridge ra epîdemologe Johanna Riha vat: "Projeyê azadîya cinîyan û demokrasîyî yê Rojawanî vera tîrantîya dinya û şeran her tim alternatîfêkê radîkalî pêşkêş keno. Hêrişê vera nê projeyî aslê xo de hêrişê vera ameyoxê ma yê pêroyînan ê."

Nuştoxe, edîtore û hermenda grafîkî ya DYAyîje Janete Bîehl vat: "Oyo ke ame sereyê kurdan, ereban û xrîstîyananê Rojawanî bêedaletîyêko tarîxî yo û felaketêk o. QSD koalîsyonê rayberîya DYA de mutefîko tewr baş bi. Şerwananê QSDyî bi hawayêkê rûmetînî û sereberztîye şer kerd. Heqê înan o ke pêro dinya ci rê sipas bika."