Fermandaranê YJA-Starî ra Batûfa Çekdar bi wesîleya serrgêra 30. ya artêşbîyayîşê cinîyan ê kurdan ANFyî rê qisey kerd.

Fermandare Batûfa Çekdare verî şexsê Bêrîtane (Gulnaze Karataş) de pêro şehîdê teşrîna verêne yad kerdî û vat: ''Serrgêra şehadetê ci de xoverdayîşê bi layîqê ruhê Bêrîtane yeno kerdene. Fermandare Bêrîtane vera îxanet û îşxalî xo ver dabi. Ewro zî ciwanê kurdî her ca de vera hêrişanê barbaran ê dewleta tirke xeta embaze Bêrîtane de xoverdayîşêkê pîlî kenê.

Dinya bi matmendişî xoverdayîşê gerîlayan ê vera teknîk û hêrişanê kîmyewîyan ê dewleta tirke seyr kena. No xoverdayîş mîrasê Bêrîtane, Zîlane, Mazlûm, Sara, Kemal, Hayrî û Ferhatan o. 25ê teşrîna verêne ya 2022yî de ma sey YJA-Starî kewtî serra 30. ya artêşbîyayîşê cinîyan. Nê hîrê serranê peyênan de serkêşîya YJA-Starî de 2020 de Heftanîn de, serranê 2021-2022 de Zap, Avaşîn û Metîna de xoverdayîşêko pîl ame kerdene. Xîret û tecrubeyanê serran hêzê YJA-Starî vet werte. No zî xêrê ked, fedakarî û bedelanê şehîdanê YJA-Starî ra qewimîya. Artêşa ma ya cinîyan her parçeyê Kurdîstanî de vera îşxalkeran bi îradeyêkê pîlî xo ver dana.

Ewro şerwanî koyan de vera hêrişanê dewleta tirke bi hêrs û qerardarî têkoşîn kenê. Heta ke hêzê YJA-Starî est bê dişmenê kurdan do nêeşkê biresê armancê xo yê çinkerdişê gerîlayan û PKKyî. Îdîaya bawerî û azadîye ya YJA-Starî ra pîlêr çêkêka bîne çin a. Ganî şarê ma bi YJA-Starî sereberz bibo. Ma bi tecrubeyanê 30 serran resayî nê rojan û bîyî serkêşê pîlî. Ewro çar parçeyanê Kurdîstanî de û teberê welatî de vera faşîzmî têkoşînê cinîyan serkêşîya xoverdayîşê gerîlayan ê cinîyan de yeno kerdene.

Erdê ma nasname, erj û rûmetê ma yo. Ma do bi pêro hêzê xo heta peynî erdê xo bipawê. Erkê ma yo verên zî caardişê azadîya Rayber Apoyî yo. Çunke Rayber Apoyî seba azadîya cinîyan bi serran kedêka pîle daye. Coka ma sey cinîyan her kesî ra zafêr deyndarê Rayber Apoyî yê.''