TJA, Meclîsê Cinîyan ê HDP û DBPyî seba ke bale biancê qirkerdişê cinîyan ser qezaya Hezexî ya Şirnexî de çalakîya rayraşîyayîşî kerde. Vervatoxê HDPyî Ebru Gunay, wekîlê HDPyî Pero Dundar, Nurane Îmîr, Hasan Ozguneş, Rêxistinê HDPyî yê Amed, Mêrdîn, Êlih, Sêrt, Riha, aktîvîstê TJA, Meclîsê Mayanê Haştîye, keyeyê cinîyanê ke ameyî qetilkerdene û cîranê Leyla Karaaslana ke 24ê tebaxe de amebî qetilkerdene tewrê çalakîye bîyî.

Cinîyî verî Parka Aştîyê de kom bîyî û tîya ra ver bi bînaya HDPyî ya Hezexî şîyî. Cinîyan verê bîna de eşkerayîye wende û pankarta 'Dewleta seksîste do hesab bida' akerde. Eşkerayîye hetê Hemsereka HDPyî ya Şirnexî Sabuha Akdag ra ameye wendene.

Akdage vat: ''Şîdetê vera cinîyan û domanan zêdîyeno. Hînî sebrê ma nêmendo. Îqtîdarê AKP-MHPyî vera cinîyan şer îlan kerdo û pê kerdişanê xo qirkerdişê cinîyan keno meşrû. Nê rojanê peyênan de şîdetê unîformakerdeyan zêdîya. Coka hêrsê ma zî zêdîyeno. Ma wazenê hînî nê kesî ceza bigêrê.''

Vervatoxa HDPyî Ebru Gunay zî çalakîye de qisey kerd û pare kerd ke dewlete wayîrê camêrdanê kiştoxan vejîyena. Şirnex de çend rojan de 5 cinîyî ameyî qetilkerdene. Gunaye vat: ''Ma do verê cînayetê cinîyan têkoşînê xo rê dewam bikerê, xo rêxistin bikerê.''

Eşkerayîye pê sloganan qedîyaye.