Seba ronayoxanê PKKyî ra Sakîne Cansiz, temsîlkara KNKyî ya Parisî Fîdane Dogan û endama Têgêrayîşê Ciwanan Leyla Şaylemez ê ke Paris de ameyî qetilkerdene Bologna de bi tewrbîyayîşê bi hezaran kesan rayraşîyayîşêk ame kerdene.
Rayraşîyayîş bi şîara ''Bi şorişê Rojawanî, cinîye, cuye, azadîye'' ame serûberkerdene û endamê Rete Kurdistan, Rete Jin, Jineolojî Italia, Non una Di Meno, Ya Basta û Labas û temsîlkarê zaf rêxistinanê sîyasîyan û komelkîyan, sendakîyê wendekaran tewrê ci bîyî.
Şaristananê Emili Romagna, Modena, Parma, Firenze, Padova û Roma ra zî zaf kesî tewrê rayraşîyayîşî bîyî. Rayraşîyayîşî saete 15:00 de meydanê 20 Settembre de bi dansê Las Tesîsî dest pêkerd. Rayraşîyayîş de seba Erdoganî ame vatene: "Kiştox, îşxalker, dîktator ti yî."
Rayraşîyayîş de pankarta bi nuşteyê ''Eke na cuya min a seba awankerdişê ci ganî ez têkoşîn bikera.'' ame berzkerdene ke no vatişê Sakîne Cansiz o. Heman wextî de fotografê hîrê şorişgêran û alayanê YPG-YPJyî û yê PKKyî ameyî kiriştene.
Cinîyanê Îtalya sloganê ''Koyanê Kurdîstanî ra heta şaristananê ma; cinîye, cuye, azadîye'' vat. Meydanê Maggiore de rayraşîyayîş vurîya bî nawnayîşêk.
Qiseykerdişan ra dima çalakîye bi performansê Las Tesîsî qedîyaye.
