Hurîye Aslan a ke cuya ci bîbî babeta belgefîlmî yê ‘Kênekê Dêrsimî yê vîndîbîyayî’ û nê belgefîlmî ca girewtîbî, dewa ci de bi şiwareyan ameye wedarnayene. Aslan a ke heme ferd ê keyeyê xo Terteleyê Dêrsimî de vîndî kerdê, çend rojî verê cû Stenbol de dinyaya xo bedilnabî.

Dewa Pirdê Sûrî ya  qezeya Pilemûrîye ya Dêrsimî de dimayê merasîmî Aslane bi şiwareyan ameye wedarnayene. Parlamenterê CHP’yî Polat Şaroglu, Serekê Şaredarîya Maltepeyî Alî Kiliç, Serekê Şaredarîya Pilemûrîye Muslum Tosun, partîyê sîyasî, temsîlkarê rêxistinanê cimatî yê sîvîlî û xeylî hemwelatijî tewrê wedarnayîşî bîyî.