Konferansê Cinîyan ê Mîyanneteweyî yê 2. yo ke hetê Torra Cinîyî Ameyoxî Awan Kenê ra yeno serûberkerdene, Zanîngehê Teknîkî yê Berlinî de bi beşdarîyan bi seyan delegeyan dest pêkerd. Konferanso ke şîarê ci 'Şorişê Ma: Azadkerdişê Cuye yo' bi seremonî ame akerdene. Cinîyî bi kincanê xo yê neteweyîyan tewrê konferansî bîyî.

Delegeyan rê qumaşê rengînê ke serê înan de nameyê gerîlayanê ke pê kîmyewîyan şehîd bibî, ameyî vilakerdene.

Vervatoxa Têkilîyanê Teberî ya TJK-E Melîke Yaşar qiseykerdişê akerdişî yê konferansî kerd. Yaşare verî Nagîhane Akarsel û Jîna Emînî yad kerdî û pare kerd ke cinîyî Îranî ra heta Arjantînî serkêşîya xoverdayîşêkê pîlî kenê. Melîke Yaşar qiseykerdişê xo bi sloganê 'jin, jiyan, azadî' qedîna.

Mojnayîşê sînevîzyonî ra dima Endama Kongreya Neteweyî ya Kurdîstanî (KNK) Nîlufer Koç qisey kerd û vat: ''Şerê Dinya yo 3. hetê endamanê NATOyî yê Amerîka û Îngilîstanî ra yeno kerdene. Mexdûrê tewr pîlî yê nê şerî zî cinî yê. Şîdetê vera cinîyan asta tewr berze de dewam keno. Nê dewrî de sîstemo kapîtalîsto ke şîdetê cinîyan keno, mîyanê krîzêkê pîlî de yo. Vera cinîyan ê şerwanan çekê kîmyewîyî şuxilîyenê. Çunke cinîyê kurdî vera sîstemê serdestî sîstemêkê alternatîfî awan kenê. Felsefeya têgêrayîşşê cinîyan ê kurdan têna sloganê 'jin, jiyan, azadî' nîyo. No slogan netîyea felsefeya Abdullah Ocalanî ya. Pêro dinya de cinîyî dormeyê nê sloganî de yew benê û vera sîstemî xo ver danê. Ma bi analîzanê birêz Ocalanî musayê ke senî bi azadî biciwîyê. Ma ancax bi rêxistinbîyayîşî eşkenê dişmenan çin bikerê.''

Meryeme Rawî derheqê îhtîmalê awankerdişê rayîrê hîrêyînî yê cinîyan ê vera polîtîkaya şerî fikrê xo vila kerdî û vat: ''Wexto ke Amerîka, Pakistan û mutefîqê înan nêeşkayî welatanê yewdînî awan bikerê înan Talîban û DAÎŞ awan kerdî. NATO û Amerîka 20 serran ra dima welatê ma teslîmê rêxistina qetilan Talîbanî kerd. Nika pêro welatî xîret kenê ke Talîbanî reyde têkilîye ronê. Şarê Afganîstanî hînî zanenê ke azadî, edalet û demokrasî têna pê têkoşînî benê. Sey Yewîya Cinîyan ê Şorişgêran a Afganîstanî erkê ma yo ke ma xo bi rêxistine bikerê. Ma hetê cinîyanê Rojhelatê Kurdîstanî û Îranî de yê. Cinîyî do bi sloganê 'jin, jiyan, azadî' tarîxê xo binusê.''

Lolita Chavez ard ziwan ke şarê Amerîkaya Latîne do heta peynî vera şer û çekanê kîmyewîyan ê serê Kurdîstanî têkoşîn bikerê û vat: ''Erdê ma Abya Yala hetê Amerîka ra ame îşxalkerdene. Ewropa zî sûcdarêka ney a. Ma do sey wayanê xo yê kurdan sînoran derbaz bikerê û têkoşîn bikerê. Ma do bi xo qerar bidê ke erdê xo de senî biciwîyê.''

Komelnase û eko-femînîste Ariele Saleha ke Awusturalya ra beşdara konferansî bîya vat: ''Seba ke têkilîya cinîyan a bi xoza birîyaya îşxalî zêdîyayê. Dinya ser de tewr zaf cinîyî raştê teda û îstîsmarî yenê û rijnayîşê ekolojî zî ameyoxê cinîyan çin keno.''

Aktîvîsta haştîye-femînîsta îtalyane Genevieve Vaughan û Komeleya Cinîyan a Ameyoxî ya Hîndîstanî ra Kavita Krişnan zî îstîsmarê vera cinîyan, sîstemê kapîtalîstî û têkoşînê azadîya cinîyan ser o qisey kerd.

Roniştişo diyîn pê pers û cewaban dewam keno. Cinîyî dima do tewrê kargehan bibê.