Zanistîya Jineolojî 2015 de Rojawan de ameye rêxistinkerdene. Jineolojî bi perspektîfê akademî karanê xo kena. Rojawan de dersê Jineolojî zî dayenê. 

Zanîngehê Rojawanî de Fakulteya Edebîyat û Zanistîya Komelkîye de 2017 ra bata Beşê Jineolojî est o. Wina yeno waştene ke 2023 de Jineolojî biba fakulte. Reyna Dêrik, Hesekê, Kobanê, Minbic, Tebqa, Efrîn-Şehba û Heleb de 7 merkezê Jineolojî est ê. Binê sîwana Akademîya Jineolojî de broşur, metnê daşinasnayîş û Kovara Jineolojî yenê çapkerdene. Enstîtuyê Andrea Woşf 2019 de ame awankerdene. Enstîtu de cinîyê enternayonelî komelî ser o, Jineolojî ser o cigêrayîşan kenê.

Dewa Jinwar 10ê adara 2017î  awan bîye û 25ê teşrîna peyêne yya 2018î de temam bîye. Dewa Jinwar de cuyêka komunale, têdûşte û ekolojîke est a û na dewe hetê cinîyan ra awan bîye. Jinwar Dirbêsîyê de yo. Dewe de Akademîya Jinwar, Dibistana Uveyşe, Firna Aşnana, Dikana Jinwar, Şifa Jin û Çîftlîk est ê.

Vervatoxa Jineolojî ya Rojawanî Hena Davûd derheqê xebatanê Jineolojî yê Rojawanî de ANFyî rê qisey kerd.

Hena Davud da zanayene ke Akademîya Jineolojî mesele, zanistî, tarîx, averşîyayîşê cinîyan ser o vindena. Hena Davud vat: ''Akademîya ma kena ke cinîyî xo hetê zanistî û komelkî ra bişinasnê. 7 merkezan de ma xo rêxistin kerd. Xora meseleyê cinîyan yew bibê zî tay cîyatîyî mabênê înan de est ê. Mîsal merkezanê cinîyan ê ereban de babetî cîya yê. 

Ma xîret kenê ke goreyê îmkanan xo biresnê pêro cinîyan. Herêmanê Sûrîye de bi taybetî Şam, Heleb û Suveyda de cinîyan reyde têkilîya ma est a. Seba çareserîya meseleya Sûrîye zî girîng o ke psîkolojîya cinîyan bêra famkerdene. Ma armanc kenê ke cinîyan ê kurd, ereb, armenî, asûrî û sûryanîyan reyde qala manaya Jineolojî bikere û bikerê ke raştîya cinîyan wa bêra famkerdene. Ma heta nika perwerdeyanê Jineolojî ra netîceyê girîngî vistî destî.''

Hena Davûd pare kerd ke her merkezê Jineolojî xo rêxistin keno û wayîrê înîsîyatîfê rêxistinbîyayîşî yo. Hena vat: ''Her merkezê ma wayîrê sîstemêkê perwerde, dîplomasî, ekonomî, weşîye, çapemenîye û arşîvî yo. Jineolojî bi taybetî bale ancena  dîplomasî ser û xîret kena ke xo biresna pêro cinîyan. Têkilîya ma bi pêro cinîyanê Meclîsan est a. Zanîngeh û dibistanan de dersê Jineolojî est ê. Cinîyî û camêrdî zaf bala xo danê Beşê Jineolojî ser. Nika her fakulte de beşê Jineolojî est a.''