Şorişê Rojawanî heman wextî de seba cinîyan zî bi îmkanê destkewteyan.  Şorişî reyde waranê leşkerî, sîyasî, kulturel û cuye de cinîyî aver şîyî. Destkewteyanê Şorişê Rojawanî ra yew zî dewa Jinwarî ya. Na dewe de cinîyî ciwîyenê, debara xo kenê û perwerde vînenê. Cinîyê Jinwarî mojnenê ke wayîrê îradeyêkê pîlî yê.

Endama Akademîya Jineolojî Rûkene Rojda derheqê armancê Jinwarî de qisey kerd.

Rûkene ard ziwan ke Jinwar Şorişê Rojawanî reyde ronîya û vat: ''Şorişê Rojawanî ra dima mîyanê sîstemê Îdareyê Xoserî de cinîyî bîyî wayîrê rolan û mîyanê dezgehan de hîna zaf ca girewt. 2017 de nîqaşan ra dima Jinwar ronîya. Pêro cinîyanê ke dezgehan de xebitîyenê awankerdişê na dewe de ca girewt. 25ê Teşrîna Peyêne Roja Têkoşînê Vera Şîdetê Serê Cinîyan de Jinwar ame akerdene.''

Rûkene Rojda derheqê sîstemê Jinwarî de nê agahîyî dayî: ''Dewe de sîstemêko komunal est o. Meclîsê dewe est ê. Seba averberdişê dewe û debare 15 rojan de yew kombîyayîş yeno kerdene. Seba cinî û domanan sîstemê perwerde û akademîya perwerdeyî est ê. Cinîyê kurd, ereb û enternasyonelî her warê cuye de ca gênê. Çunke Jinwar aîdê pêro cinîyanê dinya yê. Jinwar de firin, dikan ûsn. cayê peydakerdişê hewcedarîyan est ê. Cinîyî tîya de debara xo pê heywankarî û zîretî kenê. Nêweşxaneyê Şîfa zî xizmetê weşîye dano.''

Rûkene Rojda pare kerd ke merdimî pê Jinwarî mat manenê ke senî welatêkê winasênî de dewêka winasêne ronîyaya. Rûkene Rojda îfade kerd ke na rewşe bi sereyê xo şorişêk o.