Vervatoxanê hemle Hatîp Dîcle, Zubeyde Zumrut û Sînan Onalî derheqê babete de ajansê ma rê qisey kerd.

Sînan Onalî ard ziwan ke seba haştîyêka mende azadîya Rayber Apoyî zaf girîng a û vat: ‘’Deklarasyonê PKKyî ra dima hinî ganî dewlete gamanê sîyasî û huqûqîyan bierza, zemînê muzakerayan awan bikera û reformanê sîyasîyan bikera. Ganî PKK lîsteya terorî ra bêro vetene. Ganî dewletê Ewropa zî tedaya dewleta tirke bikerê ke heqanê kurdan bişinasna û prosesê dîyalogan bîyaram ca. Vengdayîşê Rayber Apoyî tarîxî bi û bingeyê demokrasîyî eşt.’’

Zubeyde Zumrut îfade kerd ke Vengdayîşê Rayber Apoyî bîyo safhaya hîrêyîne ya Hemleya Azadîye û vat: ‘’Vengdayîşê Rayber Apoyî xerîtaya çareserîya meseleya kurdan eşkera keno. Rayber Apoyî rixmê şertanê Îmraliyî zî seba haştîye xîret kerd û game eşte. Nika ganî heqê hêvîye seba Rayber Apoyî û tepişteyanê sîyasîyan bêro caardene. Ma na çarçewe de Ewropa de xebatî kerdî û do nê xebatan rê dewam bikerê. Ma do kampanyaya ‘Ez wazena Ocalan de pêvînayîş bikera’ bidê destpêkerdene. Na kampanya do bingeyê prosesêkê neweyî yê demokratîkî zî awan bikera.’’

Hatîp Dîcleyî pare kerd ke ganî dezgehê Ewropa bikerê ke Tirkîya seba caardişê heqê hêvîye qanûnan sereraşt bikera û vat: ‘’Sîyasetê Ewropa zaf eleqe mojna vengdayîşê Rayber Apoyî. No zî mojneno ke Ewropa zî pabeyê çareserîya meseleya kurdan a. Ma kampanyaya mektuban bi şîarê ‘Ez wazena Ocalan de pêvînayîş bikera’ danê destpêkerdene. Nika seba haştîye komel de îradeyêko pîl virazîyayo. Şert û mercê haştîye zî dîyar ê. Ganî cade seba azadîya Ocalanî gamê hewceyî bierzîyê. Seba destekê prosesê neweyî û seba averberdişê hemle û kampanyayanê xo têkoşînê ma do dewam bikero.’’