Koma Cinîyî pîya Xurt ê ke zafê rêxistinê cinîyan tede ca gênê, vat  'Hînî ma kiştişê cinîyan rê tahamul nêkenê' û wareyê Îskeleyî yê Kadikoyê Stenbolî de dest bi kampanyaya 'Kiştişê Cinîyan Vindarne' kerde. Parlamenteranê HDP'yî Zuleyha Gulume û Oya Ersoye zî paştî daye çalakîye. Çalakîye de bale ameye antene serê şîdetê  camêrdan.

Bi nameyê kome Ferîde Eralpe eşkerayî daye û va, "Seba qedînayîşê kiştişê cinîyan ma ameyî pêser. Hînî tahamulê ma nêmend ke ma ra yewna kese kêm bibe. Wexto ke ma no çi vatêne cinîya bi nameyê Nadîra Kadîrove keyeyê parlamentera AKP'yî Şîrîn Unale de merde ameye dîyene. Embazan û keyeyê aye da zanayene ke Kadîrove rê tacîzêko cînsîyetperest ame kerdene. Serewedaritişê cinîyan ê verba şîdetî newe nîyo. Tarîxê ma têkoşînê xoverdayîşê cinîyan o. Seba nê têkoşîn mekanîzmayêk nê welat de çin o. La ma eşkenê şîdetê camêrdî biqednê. Heta ewro ma bi têkoşînî wayîrê zafê destkewteyan bîyî. Eke feraseto ke camêrdan paweno bêro vurnayene, do nê şîdetî zî bîdê vindertene.‘‘ Eralpe eşkera kerd ke ê do her roje seba 5 deqayan çalakîya vengvetişî virazê.