Dewa Kerranî ya qezaya Kanîreşî ya Çewlîgî de cinîyêke bi guleyê çeka qorîcîyî bi hewayêkê şikdarî dinyaya xo bedilnaye.

Kadere Y. ke pîya bi mêrde û qicanê xo Îstanbul de ciwîyena semedê tehtîlî pîya bi di qicanê xo ameybî dewa Kerranî. Kadere. Y. hetê merdimanê ci ra birîndar ameye dîyene. Ame îdîakerdene ke aye pê çeka qorîcîyî xo kişto. Cenazaya ci semedê otopsî ameye berdene Nêweşxaneyê Dewlete yê Çewlîgî.

Goreyê Jinnewsî menga hezîrane de 26 cinîyî ameyî qetilkerdene û 17 cinîyî zî bi hewayêkê şikdarî merdî. Menganê verênan ê emserî de tewr tay 144 cinîyî ameyî qetilkerdene.