Dewleta tirke ya îşxalkere 22ê temmuze de pê droneyanê çekdaran fermandarî Jîyane Tolhildan, Roje Xabûr û Barîne Botan qetil kerdbî. Rêxistin, grûb û kolektîfanê cinîyan ê Katalonya hêrişê dewleta tirke bi mesajêkî şermezar kerd.

Mesaj de ame vatene ke Şorişê Rojawanî hêvîya têkoşînê azadîya cinîyan o û şerwanê cinîyî yê Rojawanî pêro cinîyan ê têkoşeran rê benê mîsal. Mesaj de ame parekerdene ke cinîyanê sey Jîyane Tolhildan, Roje Xabûr û Barîne Botan YPJ kerd pîlêr û xurtêr.

Mesaj wina dewam keno: ''22ê temmuze de Jîyane Tolhildan, Roje Xabûr û Barîne Botan hetê dewleta tirke ya faşîste ra ameyî qetilkerdene. Nê hîrê şehîdî tersê dewletanê faşîstan ê vera cinîyan eşkera kenê. Ma nê qirkerdişî, Erdoganî û hemkaranê ci şermezar kenê. Dewleta Spanya ya ke hemkara Tirkîya û endama NATOyî ya, hemkara nê sûcî ya.

Ma seba şehadetanê hemrayanê xo hêrsbîyaye yê la têkoşînê înan keno ke ma dewam bikerê. Ma zanenê ke her şehîde şorişî kena pîlêr. Ma dejê cinîyan ê şorişgêran ê Kurdîstanî zerrî ra pare kenê û Jîyane, Roje û Barîne bi rûmetî kenê. Roşnî û xoverdayîşê şima resenê erdê ma ser û pê na germîye ma zî tewrê têkoşînê azadîye benê.''