Sereka Komeleya Cinîyan a Rosa Adalete Kaya derheqê 25ê Teşrîna Peyêne ya Roja Tekoşînî ya Vera Şîdetê Serê Cinîyan de ANFyî reyde qisey kerd.

Kaya vat: "Cinîyan bi şîara 'şîdetê vera cinîyan polîtîk o' dest pê têkoşînê xo kerd û reyna bi vatişê 'sedem dewlete ra yo, çareserîye zî cinîyan ra ya' têkoşînê xo her ca de vila kerd. Cinîyî ancî zî vera şîdetî têkoşînê xo bi rêxistinbîyayîşêkê xurtî dewam kenê û na rêxistina cinîyan ê kurdan çar parçeyê Kurdîstanî de û Tirkîya de dewam kena."

"Şîdetê vera cinîyan beno zêde. Sebebê ney zî polîtîkayê dewlete yê vera cinîyan ê. Hêrişê vera cinîyan polîtîk o. Ma do vera hêrişan rêxistina xo xurt bikê û cayanê ke dewlete wazena ma veng bikê ma do ca nêverdê. Cinîyê kurdan Rojhelatê Mîyanênî de modelêka newîye awan kenê û naye ra hedefê dewlete de yê. Seba ke dewlete sîstemê cinîyan ra tersena û wazena bi hêrişanê xo destkewteyanê cinîyan çin bika. Verê çimanê rayaumûmîye de sîyasetmedara kurde Hevrîne Xelef qetil kerde. Welatî de û teberî de dewlete hêrişê cinîyan kena. Çunke modela ke cinîyanê Rojawanî awan kerde tesîrê dinya kerde."

"Vera şîdetê serê cinîyan ma do pêro taxan û qazayan ê Amedî de kombîyayîşan bikê, dezgehanê sey Baro, Tîv, ÎHD, OHD û TJA reyde raporê şîdetî eşkera bikê. Na çarçewe de ma do derheqê şîdetî, rayîrê huqûqî, komel û rêxistinkerdişê cinîyan de kombîyayîşan do serûber bikê. Ma do komxebata ke 200 cinîyan ra yena meydan serûber bikê. 25ê teşrîna peyêne de ma do rayîrşîyayîşê cinîyan ê bi meşaleyan bikê. Ma emser bi sloganê 'Ma do xoverdayîşê têkoşînê cinîyan berz bikê' bivejîyê meydanan."

Kaya peynîya qiseykerdişê xo de venga cinîyan da û vat: "Sey Komeleya Cinîyan a Rosa ma venga pêro cinîyanê Kurdîstanî, Tirkîya û dinya danê ke têkoşînê xo yê rêxistinkerdişî, paştdayîşî û xoverdayîşî berz bikê. Ma têna bi rayîrê xoverdayîşî û rêxistinkerdişî eşkenê ziwanê şerî û şîdetê dewlete yê vera cinîyan biqedînê. Seba naye ganî ma xoverdayîşê xo xurt bikê û paştdayîşê xo zêde bikê."