Heserekîya Konseya Rayberdişî ya KCKyî bi eşkerayîyêke veng da kurdan û dostanê ci ke wa  her ca de tewrê prosesê neweyî yê çalakîyan  bibê ke do menga teşrîna peyêne de bêro destpêkerdene.

Eşkerayîye de nê ameyî parekerdene:

''Ma prosesêkî ra ravêrenê ke qewimîyayîşê muhîmî benê. Seke yeno zanayene badê panc serran Rayber Apoyî reyde pêvînayîş ame kerdene. Rayber Apoyî mesajê xo yê kilmî de prosesêko ke ma tede pênas kerd û tewirê xo yê çarekerdişî mojna ra. Rixmo ke tecrîd hema nêdarîyo we no pêvînayîş mojneno ke têkoşînê ma netîce girewt. Bêşik rolê Hemleya Azadîye nê de gird o. Na hemle mojna ra ke tecrîd bi temamî eşkeno bêro şiknayene, azadîya fîzîkîye ya Rayber Apoyî eşkena bêra caardene û semedê çareserkerdişê meseleya kurdan gamê pêtî eşkenê bêrê eştene.

Bi nê moralî ganî ma berpirsîyarîya xo bîyar ca û serra dîyine ya hemle de têkoşînî xurtêr bikerê. Na çarçewe de ganî her kers bi hewayêkê xurtî tewrê prosesê neweyî yê çalakîyan bibo ke sereyê teşrîne peyêne de do dest pê bikero. Ma veng danê şarê xo yê Kurdîstan û Ewropa ke bi girseyî û xurtî tewrê çalakîyanê 1 û 2ê teşrîna peyêne ya 2024î bibo.

Nê prosesî de paştdayîşê bi şarê Rojawanî û wayrîvejîyayîşê Şorişê Rojawanî zaf muhîm o. 1 û 2ê teşrîna peyêne de yê ke sey Rojê Rojawanî yê Dinya û Rojê Kobanê yê Dinya ameyî bewlîkerdene, ganî paştdayîş  û wayîrvejîyayîş bêro mojnayene.  Nê rojanê muhîman de sere de şarê kurdî şarê Rojhelatê Mîyanênî û şarê dinya, cinîyî, dostî, hezê sosyalîst û demokratîkî, ciwanê welatperwerî yê Kurdîstanî û hêzê enternayonalî yê demokratîkî yê dinya ganî bi xurtî wayîrê Şorişê Rojawanî bivejîyê.

Nika wayîrvejîyayîşê Şorişî Rojawanî her wextî ra muhîm o. Hêrişê peyênî yê dewleta tirke ya qirkere mojnenê ke Şorişê Rojawanî binê tehlukeyî de yo. Hêrişê dewleta tirke qirkerdiş o, sucê şerî yo. Bi nê hêrişan wazena Şorişê Rojawanî werte ra wedaro. Coka ganî her hewxtî ra zafêr şar wayîrê Rojawanî bivejîyo. Şorişê Rojawanî şorişo hempar ê şaran o. Bi na wesîle ma  şorişê tarîxî yê hemparî yê şaran reyna heme şaran rê pîroz kenê. Pawitişê nê şorişî berpirsîyarîya tarîxî ya. Ganî vera heme hêrişan Şorişê Rojawanî dahîna zaf bêro wayîrvejîyayene.''