Endama Merkezê Heqanê Cinîyan ê Baroya Amedî Avûkate Rozerîne Arslan ANFyî rê derheqê cînayetanê cinîyan de qisey kerd.

Rozerîne ard ziwan ke wexto ke cinîyî xo pawenê mehkeme biranê winasênan dana ke seke cinîye sînorê pawitê meşrûyî binpay kerdî. Avûkate Rozerîn Arslan vat: ''Ma roniştişan de vînenê ke mabênê cinîy û camêrdan de cîyakerîye yena kerdene. Wexto ke babete bena camêrd mehkeme pê îdîya neheqîye û nêzdîbîyayîşê holî ceza kêm kena. No zî vurîyena rewşa bêcezaverdayîşî. Camêrdî ney ra cesaret gênê û vera cinîyan hîna bi çêrî têgêrenê. Hetê bînî ra sebebê zêdîyayîşê hûmara kiştişê cinîyan, kêmasîya mercan ê edlîyan û îdarîyan o. Tîya de kêmasîya hêzanê asayîşî zî esta. Tedbîrê seba pawitişî nênê caardene û hêzê asayîşî mabênê cinîy û camêrdan de mabênçîtîye kenê. Coka hûmara qirkerdişê cinîyan zêdîyena.''

Avûkate Rozerîne pare kerd ke zafêr dezgehê cinîyan  pê destê mehkeme ameyî qefilnayene û no zî mojneno ke her şeklê xirabîya vera cinîyan polîtîk a. Rozerîne vat: ''Nê dezgehî nêbê têkoşînê cinîyan kêm manenê. Çunke ganî cinîyî vera kerdişan bi hawayêkê azadî qisey bikerê.''

Rozerîne da zanayene ke tay dosyayan de nêzdîbîyayîşê mehkeme înan zî mat verdeno û vat: ''Roniştişanê dewayanê kişîyayîşê cinîyan de meseleyî tim vurîyenê 'xapîyayîşê camêrdî' yan zî cîyêkê bînî. Tewr zaf dadgerî firsend danê ney. Serebûtanê kişîyayîşê cinîyan de bi îdîaya tahrîkî' kêmkerdişê ceza bêcezaverdayîş û teşwîq o. Mehkemeyî zî camêrdan pawenê yanî bi kilmî qirkerdişê cinîyan polîtîk o.''