Koordînasyonê KJK yî derheqê betalkerdişê Pêkerdişê Îstanbulî û xoverdayîşê cinîyan yê vera nê qerarî de eşkerayîya nuştekîye daye.

Eşkerayîye de nê ameyî parekerdene:

''Tirkîya Pêkerdişê Îstabulî yo ke 2011 de îmza kerd 2021 de betal kerd.  Tirkîya de her roje netîceya zîhnîyetê nêrî de cinîyêke yena qetilkerdene. Tirkîya mîyan dewletanê ke şîdetê vera cinîyan tede tewr zaf o, de ya. Vera cinîyan û domanan şîdet, tacîz û tecawuz her roje zafêr benê. Wextê winayênî de Pêkerdişê Îstanbulî bi destê serekkomarê faşîstî yê Erdoganî ame betalkerdene.

Na darbeya ke bi destê îqtîfaqê camêrdî yê xirabin, zalim û xespkêr AKP-MHPyî ameye kerdene raştê têkoşînê cinîyan ameye. Îstanbul, Anqara, Îzmîr, Amed, Antalya, Dêrsim, Adana ra heta Hatayî xeyêk bajaranê Kurdîstan û Tirkîya de cinîyê ke vejîyayî kuçeyan vera nayî hersê xo ard ziwan. Cinîyan pê çalakîyan barîkatê polîsan ser û bin kerdî. Cinîyan vat têkoşîn rê dewam. Çarçewa paştdayîşê cinîyan de 1ê temmuze hetê cinîyan ra yew peynî ne bîye roja destpêkerdişê têkoşînêkê neweyî.

Ma sey Koordînasyonê KJKyî çalakî û xoverdayîşê nê cinîyan ke semedê azadîye sond wendo, selam kenê. Ma zî  têkoşînê xo yê azadîye yê cinîyan de do qet game peyser meerzê û bi rike û îdîaya pîle bidê domnayene.Cinîye ko, kuçe, keye, cayê karî û her  cayê cuye de pê têkoşînê xo yê rêxistinkerdeyî vera nêheqîye jîhat payra yê. Dêsanê tersê kenê lete leware. Ronayîşê cuya azade pê pîlkerdişê xoverdayîşê cinîyan beno. Têna serkêşîya cinîyan de cuya azade eşkena bêro pratîkerdene.  Xoverdayîşê cinîyan ê 1ê temmuze reyna ramojna ke îqtîdaro faşîst do pê xoverdayîşê cinîyan birijîyo.

Erdoganê faşîstî Pêkerdişê Îstanbulî pê destê xo betal kerd ke mesaj bido komelê Tirkîya. Erdogan wazeno ke destkewteyanê cinîyan ke pê keda pîle fînayî dest çîn bikero. Îqtîdaro ke pê yew îmza wina pêkerdiş ra ancîyeno, siba beno ke pêkeridşanê bînan ê mîyanneteweyî  ra zî biancîyo. Betalkerdişê Pêkerdişê Îstanbulî têna vera cinîyan ne vera komelê Kurdîstan û Tirkîya darbe û komplo yo. Tirkîya dewro tarî nêzî beno. Dewleta ke destê çete û mafyayan de ya vera komel, cinîyan û ciwanna bîya cinawir. La sere de cinîyê şar do vera hêrişê têkoşîn bikero.

Amerîka û Ewropa ke xo sey temsîlkarê azadîya cinîye û heqanê merdiman vînenê û xo tim wasifnenê paştî danê îqtîdarê Tirkîya ke yê dişmenê cinîyan û şaran ke wa payre bimano. No rîyo raşt ê înan û dirîyîya sîstemê kapitalîstî ramojneno. Xora cinîyî na raştîye vînenê. Ma do pê hêzê xo, zanayîşê xopawitişî û rêxistinbîyayîşî têkoşînê xo pîlêr bikerê. Cinîyî do pê yewîya xo ya bi heybete û têkoşînê xo cuya azade ronê û ser bikewê.  Ma do slogana xo ya Cinî, Cuye Azadîye bi qerardarîye pratîk de bîyare caardene.''