Koordînasyonê KJKyî derheqê hêrişanê dewleta tirke yê vera Rojawan û Herêmanê Pawitişî yê Medya de eşkerayîyêka nuştekîye daye.

Eşkerayîye wina ya:

''Hukmatê AKP-MHPyî yê faşîstî seba ke binkewtişê xo yê vera Herêmanê Pawitişî yê Medya binimno cenazayê xo vêşnayî û Taksîm de hemwelatîyê xo qetil kerdî. AKP-MHPyî seba îqtîdarê xo senaryoyê polîtîkayêkê tehlukeyînî û gemarinî amade kerdo û no senaryo ser nêkewto.

Ma hêrişanê hewayî yê ke 20ê teşrîna peyêne de bi fermanê Erdoganî vera Rojawan, Rojhelat û Başûrê Kurdîstanî dest pêkerd, şermezar kenê. Ma keyeyanê meftayan rê serweşîye û birîndaran rê şîfaya xeyrîne wazenê. Îqtîdarê cergan ê AKP-MHPyî tengîye de yo. AKP-MHPyî qetî polîtîkayanê xo yê qirkeran ra fek vera nêda. Na çarçewa de bi tecrîd û îşkenceyî waşt Rayberîya ma ra zî qesas bigêra. Dewleta tirke vera tepişteyanê sîyasîyan îşkence, surgun û tedayî zêdînayî, xozaya ma talan kerda, vera şerwananê azadîye çekê kîmyewîyî şixulnayî. Dewleta tirke nê hêrişan de bi organîzekerdiişê hêrişê Taksîmî waşt ke destûrê hêzanê mîyanneteweyîyan bigêra. No îqtîdaro faşîst wazeno pê gonîye weçînayîşan de ser bikewo, coka eşkeno her xirabîye bikero.

Êyê ke polîtîkayanê qirkeran ê AKP-MHPyî xurt kenê û hêrişanê ci rê destûr danê hêzê mîyanneteweyî yê. Nê hêrişan ra verî pêvînayîşanê bi Rûsya û Amerîka de na babete ameye nîqaşkerdene. Ma nê hêzanê hemkaran û şirîkanê qirkerdişê kurdan şermezar kenê. Şarê ma zaneno ke îqtîdarê AKP-MHPyî amadekarîya şerêkê hîrayî keno. No şer bi destûr û hayîdarîya Amerîka û Rûsya yeno kerdene. Şarê kurdî qirkerdişê dewleta tirke, destûrê Amerîka û NATOyî do qebul nêkero. Îqtîdarê AKP-MHPyî yo ke nêeşka Şorişê Rojawanî bifatisno pêro destkewteyanê kurdan keno hedef.

Kobanê sey cayê şorişê cinîyan nameyê xo tarîx de da nuştene. Îqtîdarê AKP-MHPyî na raştîye qebul nêkeno û çinkerdişê nê îradeyî sey sebebê estbîyayîşê xo ercneno. No klîko faşîst Şorişê Rojawanî xo rê sey tehlukeyî vîneno, yewîya azad û demokratîke ya şaran ra terseno. Heta ke no îqtîdaro zulmkar est bo peynîya polîtîkayanê gonîye û qirkeran do nêra. Coka wextê ci ameyo ke no îqtîdaro faşîst pê têkoşînêkê hemparî, bi ruhê seferberî bêro binkerdene. Estbîyayîşê rejîmê faşîstî yê AKP-MHPyî de cîhadîzm, tarîtîye, seksîzmî, merg, qirkerdiş, lêşinî û îmha est ê. Wayîrvejîyayîşê Rojawanî zî naye ra waştişê ameyoxê azad û demokratîkî yo. Wayîrvejîyayîşê Kobanê zî wayîrvejîyayîşê heq û azadîyan o.

Cinî û şarê kurdî polîtîkayanê teslîmîyetî yê îqtîdarê AKP-MHPyî qebul nêkerê. Şarê ma do esasê xopawitişî de cewab bido her hêrişê vera Rojawanî. Ma venga şarê xo û pêro cinîyan ê kurdan danê ke xo bi rêxistin bikerê û vera hêrişanê faşîstan tewirê xo yê xopawitişî berz bikerê. Ma venga rayaumûmîya demokratîke, dezgeh û rêxistinanê Tirkîya, herême û dinya danê ke vera hêrişanê çeteyanê AKP-MHPyî xo ver bidê û têkoşînê demokratîkî berz bikerê.''